Ino a la Morte
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Ti, dea teribile,
Ti, dei mortali
3Arbitra e despota
Senza rivali,
Ti, che ti domini
6La tera e 'l mar,
Ti, che le porpore
E le corone,
9Che al pien dei omeni
Tanto ghe impone,
Coi sachi e i zocoli
12Ti sa missiar;
Ti, che l'imperio
De la fortuna,
15Che me perseguita
Sin da la cuna,
Da formidabile
18Ti sa domar;
Ti, che quei stimoli
Discordi tanto,
21Che porta i omeni
De pianto in pianto,
Che li fa martiri,
24Ti sa quietar;
E ti, che al misero
Senza conforto
27Co man benefica
T'insegni el porto,
Ti, dea teribile,
30Voi celebrar.
Quanto xe stolidi
Chi destrutrice
33Te chiama, o provida
Generatrice!
Quanto i xe deboli
36Nel so pensar!
Dal dì primissimo
Che sui mortali
39E falce e fiacola
E l'arco e i strali
T'à dà 'l trifulmine
42Per dominar,
In tanti secoli
Ch'el mondo zira,
45L'imenso numero
De chi respira
S'à visto simile
48Sempre a restar.
No ti è che pausa
De la natura;
51Se un omo termina
La specie dura;
E specie e generi
54Ti fa tornar;
Che quel che regola
Sto nostro mondo
57Quanti individui
Vive qua in fondo
Come tanti atomi
60Sa contemplar.
E quela fiacola,
Che ne destruze,
63In miera d'esseri
Spande la luse,
E in miera d'esseri
66Ne fa cambiar.1
Ma ne l'empireo,
Ma ne l'inferno
69Nome più provido
Nel so governo
Chi sa trovarmelo,
72Chi 'l sa idear?
Forse un Prometeo,
Che vita e forma
75Ga dà a la polvere
Che ne conforma,
Che ragionevoli
78N'à bu a crear?
Che a virtù languida
L'à insieme unito
81Ogni delirio,
Ogni prurito,
Che l'imbramabile
84Ne fa bramar?
Ah! quanto infausto
Sia sta ogni dono,
87Le tante supliche
Che ghe al to trono,
Dea potentissima,
90Lo sa provar.
Sarè giustissimi
Numi del cielo,
93Ma impenetrabile
Destendè un velo,
E lassè un adito
96De mormorar.
Morte al contrario
Senza mistero
99Dona benefica,
Sempre sincero,
Sempre giustissimo
102Xe el so operar.
Ela a la gloria
Salva i mortali;
105Dal precipizio,
Dai più gran fali,
La virtù debole
108La sa salvar.
Vedo Virginia
Pretesa schiava;
111Vedo el decenviro
Che za trionfava,
Su la so vitima
114L'è per piombar,
L'è per distrugerghe
L'onor, la gloria;
117Ma ti, la vergine
A la vitoria
Dal vituperio
120Ti sa portar.
Chi mai de un Dario
Là in Arabela
123La funestissima
Iniqua stela,
Che lo perseguita,
126Chi sa placar?
Forsi quei providi
Celesti numi,
129Che tanti spasemi,
Che 'l pianto a fiumi
Dei so fioi miseri
132No sa tocar?
Dal stato oribile
De schiava vita,
135Dal vituperio
D'una sconfita
Ti sola, o provida,
138Ti 'l sa sotrar.
E l'invincibile
Che l'à desfato,
141Per tanti secoli
Chi è sta che à fato
Grando e magnanimo,
144Chi 'l fa onorar?
Ah! de la gloria
Che lo iragiava
147El lume vivido
Za za oscurava
Vizio e tiranica
150Sè de regnar.
Se 'l nome celebre
La fama spande,
153Se quel Macedone,
Se chiama el grande,
Soto el to fulmine
156Lo fa chiamar.
Quel pare misero
Fra quatro fioli,
159Che no ga un'anima
Che lo consoli,
Che le so lagreme
162Xe 'l so disnar,
Che smunta e macera
Su quatro strazzi
165Vede puerpera
De tre regazzi
L'infelicissima
168Che lo sa amar,
Che va slanzandoghe
In fra el sangioto
171De le ochiae languide
Senz'altro moto,
Me par de vederlo
174Morte a invocar;
Me par de vederte
Morte pietosa,
177Gnente teribile,
Gnente sdegnosa,
Quei miserabili
180A consolar.
Me par de vederte
Soto altro aspeto,
183Sempre benefica,
Giusta in efeto,
La falce e 'l fulmine
186Adoparar.
Vedo i Dionisi,
Vedo i Neroni,
189Vedo i Caligola
Zozo dei troni
Per ti la polvere
192A morsegar.
Chi dai pestiferi,
Chi ne purgava?
195Forsi el trifulmine
Che i consacrava,
E che intangibili
198Ne i fa trovar?
Te onoro e venero,
Divin Petrarca,
201E dolci lagreme
Spando su l'arca
Che le to ceneri
204Sa conservar;
Ma, oh dio! perdonime,
Perchè mai dirne:
207«Le più bel'anime
La va a rapirne,
Le triste e perfide
210La sa salvar?»
Da la to Laura
Ti l'à pur vista,
213Senza quel'orido
Che la fa trista,
Ti à sentio placida
216Morte a parlar:
«L'imparegiabile,
La dona eleta,
219Prima che istabile
Fortuna meta
Nel miel l'assenzio,
222Vogio eternar.»
Oh! quante Laure
Che da fortuna
225Sempre volubile
Nela laguna
De tanti secoli
228Ti à bu a sotrar!
L'ingiusto e 'l perfido
Ti sola teme,
231E al miserabile,
Che opresso geme,
Fa manco barbara
234Sorte provar.
E là nel'erebo,
Là nel'eliso,
237Dove el reo crucia
Da nu diviso,
Dove se premia
240Reto operar;
Per ti nel'erebo
La colpa fioca;
243Beatitudine
Per ti ne toca,
E un novo secolo
246Ne fa trovar.
Dea potentissima,
Solo conforto
249De chi fra 'l turbine
Sospira el porto,
Benigna ascoltane,
252No me sdegnar:
Sì, dea teribile,
Sì, dei mortali
255Arbitra e despota,
Tronca i mii mali,
Ti che ti domini
258La tera e 'l mar.
- Note (da l'edizion del 1845)
- ↑ L'autore contempla la disorganizzazione fisica del corpo animale.