L'Ammalato in desiderio di vino
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
Son amalà qua in leto, e se credesse
De no aver co' son san vogia de vin
Voràve esser tegnù per un meschin,
Per omo indegno che so' mare el fesse.
Ma se me dura queste vogie istesse,
(Che no credo d'aver altro per fin)
Vòi bever più d'un zafo e d'un fachin,
E se 'l mar fusse vin, me farìa un pesse.
La Corte e i studi xe stà mii dileti,
Adesso xe le betole e quei chiassi
Dove se beve, o publichi o secreti.
Voltè, grami mortali, i ochi e i passi
Da le speranze che ve tien sugeti,
Che 'l vin xe 'l caro ben tra tuti i spassi.