L'Amor della Gloria
|
Edission original: |
Giovanni Battista Casti, Scherzi poetici di vari celebri autori italiani e veneziani raccolti da G.B.C., Venezia, Tip. Molinari, 1834 |
|
Fonte: |
Indice:Scherzi poetici di vari celebri autori italiani e veneziani.djvu |
| Edission e fonte ▼ |
El fiol d'un benestante,
De richezza fornio più che bastante,
Dotà dalla natura
D'una certa tal qual disinvoltura,
Se sentia nato exprè,
Per deventar dei leterati el re.
So pare mo piutosto ruvidotto,
Omo tagià alla bona
E che in confronto de un contratto, e un stoco
Gavea in cesto el saver della Sorbona,
Al genio de sto fiol pensava poco,
Anzi ghe urtava a vedarlo distrato
Dall'interesse, e a far da leterato.
Figureve cha tagio interessante
Gera sto benestante,
Immaginè da vederlo vestío
Davanti mal assae, pezo da drio.
Velata in abrezè,
Calze alla barolè,
Crosato rosso, scarpa [...] grossa,
Nel resto in tutto egual: che bella cossa!
No se usarà a Parigi, eppur lu usava
Quando a un marcà lu andava,
De andarghe, e de tornar co sto equipaggio
Le so sachette messe alla barona,
Benon contrapesae banda per banda
Da bacalai, da pezzo de formaggio.
Co un'amarezza granda
Quel fiol nato alla gloria,
Vedea sior pare messo alla carlona,
Un contraposto far tanto trivial
A lu che per talentò e per memoria
Sperava d'acquistar posto immortal.
Ma assiduo tanto, e tanto
Ai so affari el tendea, con interesse,
Del fiol ridendo sul bizzaro impianto,
E seguitando andar come el so solito
Sbaldido la velada, e le braghezze:
Ma seca ancuo, seca doman, e dai,
Tanto i elastici el pare gà slongai,
Che i paterni diritti adoperando,
Cussì el ga dito a sta lazagna in grando.
Se per farve un fio de sesto
Volentiera ho tanto speso,
De arlevar chi me comanda
Certo in vu no gò preteso.
Vostro nono poverazzo,
Quando a scuola el ma logà,
Ch'el mio nome e qualche conto
Far savesse, gà bastà.
Ma le cosse principali,
E che in rista lu m'à messo,
Quelle xe che a mio dispetto
Trascurar vu volè adesso.
De far soldi xe stà el primo,
Fra i ristretti insegnamenti,
Che col seguito del tempo,
O' trova fra i concludenti.
Su ste trazze caminando,
Qualche cossa ho accumulà,
Altrimenti m'avria visto
Alle preste a carità.
De sta grossa e mezza lana
Me contento andar vestio,
Ma no go chi per credenze
Gnente dir me possa drio.
E un contegno conveniente
Xe el sparagno più sicuro,
De brillar no me n'importa,
E brillar mi no procuro.
Sempre avezzo in sta maniera
A passar per omo onesto,
Sofro assae che co precetti
Vegnì vù a seccarme el cesto.
Quei sempiezzi e quele cosse
A chi pol se ghe le lassa,
Che per mi no posso certo,
Mantegnir dei porchi in grassa.
Dirghe tutte ste cosse a un leterato
Par che sia stà sior padre un poco mato:
No soffre el fio l'afronto,
E za disposto e pronto
A patir per la gloria ogni sventura,
Il tergo volge alle paterne mura.
El va erando,
Pitocando,
Per la gloria,
Per la boria,
Ma al prurito
D'un alloro,
L'apetito
El più sonoro
Tol el posto, e sto sapiente
Xe imminente,
A [...] sora una strada
La so vita adolorada.
In stato barbaro
Cussì condoto
A streti calcoli
Lu s'à ridoto.
Del pare all'abito
Prima indecente,
No ga dà l'animo
De dir più gnente.
Con vere lagreme
De pentimento
Gettando subito
Compatimento;
Quel teto rustego
Che l'à arlevà
L'à de revederse
Desiderà.
Assiduo ai fatti soi, quel che nol giera
Ecco ridotto un presuntuoso, un mato,
A abbandonar la splendida carriera,
18Ch'el voleva calcar da letterato:
Gh'è de poderlo far la so maniera,
Ma ghe vol altri lumi e un altro stato,
E chi xe come questo un pretendente,
22Tegna ste glorie e sto casetto a mente.