L'Aseno Verde
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Certa dona Gasparina,
Rica, vedoa d'un fator,
Visentina, lombi e schena
Gera piena de calor.
5De che ani? Coss'importa?
I è cinquanta a san Martin,
Ma la i porta!... L'era ancora
Su l'aurora del morbin.
Fin al zorno de quel santo,
10Tra la pizza e la virtù,
Tanto e tanto la se inzegna,
La se segna, e la sta su.
Ma trovandose al pachieto,
Che santifica quel dì,
15Bortoleto sentà arente,
La se sente... za capì!
L'è za in fati un bel batochio
Bortoleto ben formà!
El ga un ochio!... e quela gamba?,
20L'aria stramba da soldà.
Ma quel po ch'el cuor ghe roba
Xe mo un naso... del gran stil
Co la goba, tinto in rosso,
Longo, grosso e vescovil.
25A la vista de quel pezzo
Là a Vicenza una ogni tre
Va in borezzo. La par mata;
Valo a cata mo el perchè?
Qua a Venezia po le done,
30Educae come convien,
Xe minchione su sto tomo:
Le tol l'omo come el vien.
Ma tornando a Bortoleto:
Vintiun ano, bel aspeto,
35Bona gamba, bona schena:
Ma 'l disnar mo? ma la cena?
L'è là un povero squartà
Da la sorte abandonà,
Che la stica tra la zente...
40Come? bon, mi no so gnente:
So che fina da regazzo
L'à copià fedelmente Michielazzo.
A l'oposto Gasparina
Ga al so comando tanto de musina;
45Che Brunoro so mario
Ga lassà, se sol dir, el ben de Dio,
E, podendola sposar,
Per Bortolo el sarave un bon afar.
L'è vechieta? ben: pazienza;
50Co un tantin de compiacenza
E col farghe co giudizio,
Ora questo, or quel servizio...
A bon conto intanto lu...
Cinque in vin, conzo in colmo e ben passù.
55E po... bela! co la mor
La podaria lassarlo anca un signor.
Sumando sti vantagi e ste speranze,
Bortoleto, che in fondo no xe un'oca,
Mete la binda ai ochi
60A quela natural antipatia
Che ga la zoventù per le antigage,
E acorzendose che la Gasparina,
Soto cozzo lo varda, e po sospira,
El sospira anca lu coi ochi lustri;
65Anca lu la saeta:
El par proprio un putelo
Che sgangolisce sora la polpetta.
El la loda, el la inzucara,
El ghe mua 'l piato, el ghe tempara 'l vin,
70El ghe fa de comieto e de penin:
E po de quando in quando
El ghe va in t'una rechia smozzegando
Qualcheduna de quele parolete
Maliziose, grassete, che ale vedoe
75Ressuscita le idee matrimoniali...
A le curte, no termina el pachieto,
Che al so bel Bortoleto,
Imbriaga d'amor, la Gasparina
Ga za promesso cuor, man e musina.
80Ma bisogna mo dir la verità,
In barba de la so ninfomania,
Gaspariaa no gera de la fragia
De sti nostri moderni
Spiriti forti in cotole,
85Che se buta in tel cesto filosofico
I riguardi del mondo per bon ton.
Ga sempre imposto el poi. C'an diraton?
La se ricorda, che xe un ano apena
Che Brunoro, bon'anima, xe morto.
90Tornarse cussì presto a maridar!
Se ghe presenta ai ochi de la mente
Cronologicamente
I so cinquanta carnevali in fila,
E poverazza no la xe tranquila.
95«Figurarse (la dise) co i me vede
Sposar su quela fregola de naso,
Quel zovenoto de bela presenza,
Figurarse che chiasso per Vicenza!
Da l'altra parte a dirsela po, dopo
100Che ò visto Bortoleto,
Mi no posso più star senza de lu,
Nè voi certo lassarmelo scampar.
Coss'oi donca da far?»
Per bona sorte mo la so massera,
105Meneghina da Schio,
Doneta de proposito
E in ste materie dota,
La gera vedoa de la terza cota.
Gnente de megio per la circostanza.
110La la chiama a consulta
Una sera sul tardi,
La ghe conta 'l so caso,
La smania per quel naso, e i so riguardi.
Franca come un dotor la Meneghina:
115«Cara la mia parona (la risponde)
No ghe badè. Sposeve e lassè dir!
Sih! chi volesse tenderghe a sti mati,
Ghe saria per nu mai consolazion?
El matrimonio xe un'opera pia,
120E chi replica 'l ben merita più.
Qua no credo falar. Mi, graziadio,
M'ò maridà tre volte,
E son sempre disposta per la quarta.
Riguardi s'à d'aver a far del ben?
125E po, parona, fideve de mi.
In cao quindese dì... bon, cossa dighio,
Cambieme nome se in tre zorni al più
Nissun pensa più a Bortolo, nè a vu.
Forsi doman qualch'altra novità
130(Che za no ghe ne manca)
Torna a portar le chiacole a man zanca.
Per esempio, quel aseno ch'è là...
Ghe zogo, che co un fià
De furberia, de industria,
135Tra quel aseno e mi
Demo sesto a sto afar.
Lasseme mo pensar:... ghe l'ò catada.
Andè; deve una bona maridada,
Rispondo mi de tuto;
140Ma ricordeve, che volemo un puto.»
Consolada, contenta,
In pressa, in furia, ma però in secreto,
Gasparina se sposa Bortoleto.
Bon! ma Vicenza in tre minuti è piena
145Del matrimonio de la Gasparina;
No gh'è cafè, conversazion, nè cena
Che no parla de naso o de musina.
Dusento merbinosi, per far scena,
S'alza co l'alba, e spogia la cusina
150De grela, de farsora e de stagnada
Per andarghe a sonar la matinada.
Una bona casota, giusto là
Su la piazza de l'isola, in canton,
Che Brunoro s'aveva fabricà
155Co i so sparagni, a spese del paron,
Gera l'asilo, dove, consumà
La solita nuzial operazion,
Desnombolai ronchizzava sul leto
Imeneo, Gasparina e Bortoleto.
160Andava za quei mati concertando
Le caldiere in baritono e in contralto
Soto el balcon dei conjugi, aspetando
Per scomenzar che spontasse da l'alto
Quel naso ilustre a chiapar aria, quando
165Dal porton de la stala con un salto
Capita in strada un aseno lisier,
Del color de le foge de figher.
Che chiacole, che chiasso a quel spetacolo!
«Elo un aseno o no?
170El par un luserton: el gran miracolo!
(Dise 'l dotor) Oh! l'è un gran caso po!
No varia la natura i so fenomeni
Cinquanta volte al dì?
No gh'è tanti somari che par omeni?
175Nè vedo che de queli ve stupì —
— Che superbo color (esclama un nobile)
E co mal impirà!
Se 'l fusse un elefante a tromba mobile,
Alora sì; ma un aseno! pecà!
180Se mete i ochiai sul naso sior'Orazia:
L'al varda soto e su:
Belo! (la dise e co che grazia;
Co che brio, zà el sa moverse colù! —
— Affè! ha rubato la camiscia al cavolo!
185(Dise quella del cafè)
Ehi, Cenci, cencio: ti regalo un pavolo
Se mi sai dir di che paese egli è. —
— Sparagne (risponde un barbier gobo
Metendo zò 'l bacil)
190Vel dirò mi che ò zirà tuto 'l globo
Prima con ....... e po con Bughenvil:
L'è nato a Cao-verde, anzi a Verdopoli,
Che xe la cavedal;
Ghe n'ò visto miera tra quei popoli
195L'è 'l verde v.....tabile animal.
Qua in Italia (sia forsi per l'aria)
Ghe n'è d'ogni color;
Là mo de stofa ......eni no varia,
I nasce tuti verdi e verdi i mor.
200Questo, per altro, podaria bel-belo
Qua in clima forestier
Deventar zalo, e po cambiar el pelo,
Come cambia le foge ogni salgher. —
— Ecolo là, colù! (ciga segnandose
205La nezza del piovan)
Colù che va la note furegandose
Per le coltre pian pian. No ve fidè,
Done, vel so dir mi, l'è el pesario. —
— Che el sia mo chi se vol, per mi alafè,
210Gnanca se vien i fioi dela Redodese,
Magari tuti dodese,
No i me dà sugizion, (risponde Beta) —
Salta suso Lucieta: — E mi ve digo
E ve lo provo: quel xe l'orca spurio!
215L'è impastà su col fiel; no lo vedè?
El fiel xe verde e amaro.
Donca pessimo augurio, parlo chiaro:
Po la m'è nata a mi, l'ano passà,
Giusto da san Martin: tanto de notola
220Verdona, tal e qual come quel aseno,
Se m'à furegà qua soto la cotola:
Figureve, che cighi! che spavento!
Me par ancora... ancora me la sento.
Core là mio mario
225Per scaturirla fora,
El ghe dà adosso, povareto! un'ora;
E mentre el strussia, el supia, el susta, el sua,
No me restelo là morto sbasio
Da un colpo in te la mente?
230Verde saveu! no ve digo più gnente.
Da le rechie cussì fin a la coa
L'aseno smeraldin studià, pesà,
Su quel color tuti à dito la soa,
E nissun graziadio s'à mai pensà,
235Che 'l gera stà depento co la scoa
Da Meneghina, che l'à mandà là
Per distrar da l'impresa i morbinosi,
E sparagnar la matinada ai sposi.
In soma da quel aseno invasada
240La fola disputando se disperde.
I picava quel dì un sassin da strada;
E bona note sior aseno verde!
Tuti parla del reo, de la picada,
E a poco a poco la memoria i perde
245Tanto del naso che de la musina.
Xela gnanca una dona Meneghina?