L'Ava che beca

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Francesco Gritti

L'Ava che beca

XVIII secolo

Edission original:	Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 6.djvu

Edission e fonte ▼

[p. 12 modifica]

L'AVA CHE BECA

Bela, zovene, galante,
     Leterata, ogni matina
     La marchesa Belaspina
     4Core subito a taolin.
Là mo a caso ghe xe un spechio,
     E con lu, da quela via,
     La fa scola de magia
     8Ai so ochi, al so bochin.
Mentre un dì cussì la studia,
     Vien un'Ava da de fora,
     Che tornava fursi alora
     12Da la fabrica del miel.
La la sente, la la vede
     Spaventada, povereta!
     La trà un cigo: Ajuto, Beta,
     16Presto, Brigida, Michiel!
Core tuti: Go qua un mostro
     Co le ale, co la bava.
     Tuti core: ma za l'Ava
     20Gh'à un lavreto, oh Dio, becà.
La marchesa casca morta,
     Per no dir in svenimento;

[p. 13 modifica]

     Beta, lesta come un vento,
     24S'à quel'empia za cucà.
La voleva là schizzarla,
     Vendicar la so parona,
     Ma la birba in man ghe intona
     28In bemol un dolce Ohimè!
Mi ò credesto (chi sa a quante
     Che sta burla ogni dì toca)
     Quei bei lavri, quela boca
     32Do rosete in un bochè;
Me pareva... A ste parola
     La marchesa se destira,
     L'avre i ochi, la sospira,
     36E la dise: Ah, no schizzar;
No me dol po miga tanto,
     La ferida xe leziera;
     Poverazza! l'è sinciera,
     40Lassa, Beta, lassa andar.
Se la lode piase ai savi,
     Figurève po a le done!
     Le voleu cortesi e bone?
     44Carezzete, adulazion.
Tra l'incenso e la manteca
     No ghe ponze più la barba.
     Mo la fragola xe garba...
     48Fora zucaro panon.