L'Esposizion dei fiori
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Mare e fia | Edission e fonte ▼ | Povara umanità → |
Ancuo so andà anca mi, da bravo fio,
a visitar l'Esposizion dei fiori,
e so restà incantà proprio colpio
al gran profumo, a tuti quei colori.
Oh quanta poesia, qual ben de Dio
sparpagnà su la tera fra i splendori
de un Sol de Magio e l'alegro cìo-cìo
dei oseleti inamorai fra lori!
Ma, a completar quel splendido bochè
gavarave volesto el caro fior
de belezza che xe i me nevodini;
quei sì, xe fiori che, no so 'l parchè,
ve inamora co tuti i so sostini
anca se i spande in casa.... tropo odor!
Ghe ne xe uno, un biondo rissolin,
che, col te dà, sto bogia, un'ociadina,
o qualche moto el fa co la manina,
bisognaria magnarlo co un basin.
Un altro, che par quanto berechin
èssar el possa, col te se aviçina,
el te fa 'l rufianon, el te strassina
a 'na carezza in logo de un papin.
La xe 'na vera esposizion de fiori
che pur avendo anca i so mati spini,
faria desmentegar crussi e dolori;
'na Esposizion de fiori tanto fini
che par el cuor saria 'na vera essenza,
se no la fusse verta.... in permanenza.