L'Ossessa
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
Una fia d'un vilan, che no gaveva
Che disdoto vint'ani, alquanto bela
Ma un pochetin sempieta,
Patìa le convulsion, e povereta
5Co ghe vegniva el mal ela faceva
Dei moti convulsivi e stravaganti
Che meteva paura ai circostanti.
In un dì del so' mal, disea sti tai:
Questi è moti da veri indemoniai;
10Oh povera putela
La fa pecà: vardèla
Se no l'è spiritada?
Senz'altro sta ragazza è indemoniada.
Oh come la se trà
15Meschina qua e de là!
Come la ciga forte!
La ga le carne morte,
Ossessa l'è sicuro,
La dà la testa al muro,
20La fa mile sberlefi:
Oh Dio, che bruti cefi!
Sentì... La se lamenta:
Un diavolo seguro la tormenta.
Essendo alora in Setimana Santa,
25Quela zente à deciso tuta quanta,
Che a Venezia la fusse da menar
Per farla el Zoba Santo sconzurar.
Eco donca che in bota
Qua a Venezia i l'à condota.
30Apena in Chiesa de san Marco è entrada
Sta povera suposta spiritada,
Per delirio fatal,
Ghe xe vegnù el so' mal,
E a cigar la s'è messa;
35Cussichè tuti l'à credesta Ossessa.
Uno che sapia sconzurar ghe vol,
Et eco Piero Samo barcariol,
Che a forza de cigar
Se pretendeva i diavoli scazzar.
40Avicinà elo donca a la ragazza,
À dito: Poverazza!
Questa xe, no gh'è dubio, spiritada:
E fandoghe la crose el l'à segnala,
Disendo: Fora, fora
45Da la parte de Dio
Scelerato demonio iniquo e rio.
Ma sta ragazza ancora
La urlava, la cigava,
Che compassion la fava,
50E sempre el Barcarol cno santo zelo
Cigava: Fora, fora
In to tanta malora
Scelerato demonio iniquo e felo;
E andava via tocando
55La puta qua e de là de quando in quando.
E per qualche momento
L'è andada in svanimento:
El che la fava creder liberada,
Ma gh'à dà l'Esorcista una vardada,
60Disendo: No xe ver,
La lo ga in corpo tuto quanto intier.
E parlando a quel diavolo co sdegno
Gh'à dito: Vogio un segno;
Ti me vol cogionar ma no te credo;
65No son minchion, e vedo
Che in sto corpo ti è ancora;
Onde presto va fora,
E dame avanti un segno,
Scelerato demonio iniquo e indegno.
70In quelo dal sopor
La s'è come svegiada, ma in furor,
Dando un pugno a sto tal tanto potente,
Che ga fato saltar de boca un dente;
E co sto segno alora
75El diavol no, ma el dente è vegnù fora.
El creder a sti Ossessi veramente
No xe degno del secolo corente,
Ma un'ignoranza crassa
Ancora resta ne la zente bassa.