L'incognita
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← Apolo in campagna | Edission e fonte ▼ | La versomania → |
L'INCOGNITA
La diga, siora bionda benedeta,
Coss’elo sto rigor da puritana?
La tira su, da brava, la veleta,
Che vedemo un tantin la so musana.
La varda quanti zoveni ch’aspeta
E che se missia e bate la terzana:
Vorla che i resta co la boca neta?
No la sarave carità cristiana.
Questi xe tuti fioi da maridar:
Zente pulita, zente onesta, zente
Che spasema d’amor per vussoria.
Se la comanda, posso combinar:
De sensaria no ghe domando gnente....
Ca de Diana, che folpo! — Andemo via.