L'ipocrisia (1817)
|
Edission original: |
Collezione delle migliori opere scritte in dialetto veneziano, Volume undecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 11.djvu |
| Edission e fonte ▼ |
SATIRA
Molte Satire del P. Cacia ci sono venute alle mani, come non meno altre di Gio. Francesco Businello, del Prete Giambattista Grotto, di un Mocenigo, di un Badoer, e di altri Scrittori della metà del XVII e del principio del XVIII Secolo. Quantunque non manchino di buone immagini, di sali, e di acute riflessioni, nulladimeno non istanno a martello co' Componimenti de' più colti e più moderni nostri Scrittori. Abbiamo inserito questa sola Satira dell'Ipocrisia, scritta da un uomo di cui non conosciamo altro che il nome. Ci è sembrato che potrà essere letta volentieri, ed è poi quasi la sola che imbrattata non sia di molte sozzure.
Le donne, i cavalier, l'armi, e gli amori
Canti l'Ariosto, e la so' Armida el Tasso,
Venero tuti, e reverente lasso
4A i poeti de l'Arno i primi onori.
Cedo l'eburnea cetra e l'arco d'oro
A chi à savesto imortalar Adoni,1
Me basta un canachion pien de taconi
8E un ramo de sambugo per aloro.
Stufo de seguitar vena amorosa
No trato più d'Amor che passa el guanto,
Che m'à fato ingiotir più legno santo
12Che no se basa in Coro a la Certosa.
Go un relogio da neve in t'una spala,
Un altro da siroco in la zontura,
Osservazion cavae da la natura,
16Pronostici crudeli che mai fala!
Done, mai più ve lodo, e no me chiapo
Se questa xe la chiusa dei Soneti!
Renonzio l'arme ai vostri moroseti,
20Seguito Giovenal, e son da capo.
Musa, me svegia un celebre motivo
Che meteràve spirito a un aloco,
Che pizzega el tavan stupido e gnoco
24Nato senza comare in tel cortivo.
Per assalir un morbo velenoso
Rabia, forza e valor vago cercando,
So che l'impresa e che l'assunto è grando,
28Co' è quel del Tonsi Agostinian famoso.2
Quest'è l'Ipocrisia, morbo e contagio
Che dei quaranta dì chiama la piova,
Peste cussì nefanda che no giova
32L'aseo, la ruta, l'osmarin, nè l'agio.
Questa xe quela birba impertinente
Che senza respetar Bole o Censure
Con sacrilego pie rompe Clausure,
36Frequenta i Chiostri e fa danar la zente;
Gramegna maledeta, amara e salsa,
Tossego a la virtù, solfere al Cielo,
Sceleratezza in maschera de zelo
40Che bate in fazza a Dio moneda falsa.
A criolar, Signor, con diligenza
El formento che dà l'Ipocrisia,
M'insegna la moral filosofia
44Che pagia resta el fito e la semenza.
Oh quanti Farisei che soto el scorzo
D'un'indegna pietà move a deliri!
No so dove ch'i trova quei sospiri
48Che basta mezo a destuar un torzo.
In Chiesa i bate el peto a colpi fieri,
Che quatro un bacalà buta in boconi,
Qualcun par un fachin, ma de quei boni
52Che liga e pesta pevere ai spezieri.
Se caminando i vede Cristi o Crose
D'un infinito Amor sacrato inesto,
I canta in primo ton, propitius esto;
56Ma dei falseti el Ciel no scolta l'ose.
Un tal veste a l'usanza del Cigogna
Co le scarpe de bruna e un capelazzo
Che pol servir d'ombrela in Canalazzo
60A quei che pesca cievoli da togna.
El ferariol xe fato a la Spagnola
Con un zipon de sagie più desmesse,
El porta po le cingie a le braghesse,
64E qualche par xe fate a cichignola.
Un tronco par el colo da far calmi,
Storto come le suste dei lucheti,
Fiamengo xe el colar, e i manegheti
68I par quei d'un Rabin che spiega i Salmi.
Questo xe quel che loda l'astinenza,
Predica l'umiliar dei bachetoni,
Ma el gode un seminario de caponi
72Che studia de ingrassar la penitenza.
El dise tutto el mal del Bonacina3
Che de la colazion defende l'uso,
E se 'l podesse el macherave el muso
76Al Diana che ne sera la cusina.4
Un pasto quando el zuna el fa in Castelo,
Ma un pasto che vol dir quatro disnari,
E che pol impenir diese boari
80Stufi de solfisar: va là, morèlo.
No trovo in tuta l'arte dei Tentori,
Mistri che tenza ben come i Chietini,
Parlo de quei birbanti soprafini
84Che roba a la virtù nome e colori.
Talun, coto al reverbero de un viso,
Vien via col delectasti me in factura,
E unindo al Creatore la creatura
88Fa regola del tre col Paradiso.
Certi, in Cale remote (e questa è bruta!)
Medita più finestre che misteri,
E mentre i finze d'osservar piteri,
92I varda le cassele a qualche puta.
Molti, che par i Maghi de Pilato,
D'amor no i sa capir qual sia la rede,
Ma in cale del Carbon spesso i se vede
96A far l'aniversario al celibato.
Altri dise, ch'al senso i par de piera,
E con Giusepe Casto i s'incorona;
Ma se i lassa el tabaro a la Parona,
100I tira per el busto la Massera.
No se pol dir i sentimenti sodi
E l'aversion che i mostra per gabarne!
Ma se ghe vien qualche bocon de carne,
104I la sa cusinar in cento modi.
I ruza come l'onda apresso al Molo
Se qualchedun a Strà spesso li manda,
Ma ga rason la birba veneranda,
108Perchè l'Ipocrisia no lassa el Dolo!
Talun va in certe Case cussì fate
A predicar miracoli de testa,
E se la nena i cata poco lesta
112I ghe sporze segreti da far late.
I pìa le Camariere co i Sermoni
Circa le obligazion del proprio stato,
E qualche aloca impara dal beato
116Tegnir a man la roba dei Paroni.
Chi porta un Agnus-Deo, chi una Croseta,
Chi un Santo al fantolin, chi a siora Mare,
Favori che va in testa de sior Pare,
120E scandaliza i puti anca in seleta.
Chi segna la solana su i casini,
Chi agiuta a indopionar le cosse sante,
Aciò vicin al sen l'ochio furfante
124Goda la caponera e i colombini.
E questi è quei che vanta esser de giazzo?
Oh chi podesse aver le crepe fate
In ocasion de romperse pignate,
128Che bel monte faria de bon terazzo!
Se i vede qualche Venere barona,
D'un lascivo penel pazzìa che toca,
Mi credo che ghe vegna l'aqua in boca
132Bastante a rinfrescar Piazza Naona.
I loda col disegno la figura,
La proporzion, la mina, el viso, el peto,
E un'estasi che vien da impuro afeto,
136Onora più de l'arte la Natura.
Dopo la sbabazzada a panza piena,
De l'Ipocrita fin massima infame,
I dise, che l'autor merita fiame,
140E che ricerca l'opera ugual pena;
Malan che Dio ghe dia! quest'è un schiamazzo
Da farse a prima vista dei colori,
E no sfogar el zelo da Censori
144Forsi dopo d'aver la copia a sguazzo.
Chi vol sentir a mormorar con frase
Ascolti de l'Ipocrita i Sermoni,
Consideri el parlar dei Bachetoni,
148Cigale de Pluton che mai no tase.
I à certe bizarìe che toca l'osso,
E presto i fa d'un Santo un Anticristo,
Nè forfe, nè sartori el mondo à visto
152Che sapia tagiar megio i pani adosso.
I dise: Quela è un viso da sforzada,
Quel altro vive a spale de l'amiga,
Quel tal xe pien de bezzi e nol sfadiga,
156Qualche ziogo de man serve d'entrada;
A Momola ghe piase le marende;
Lugrezia fa una vita cortesana
E so Marìo la crede una Susana,
160Ma 'l ga rason perchè do' vechi spende;
Quel povero novizzo è un soranelo
Ma presto el sarà bon da tacar soto,
La femena è d'un genio tropo roto,
164Xe un Petener compare de l'anelo;
Peraltro una bel indole ghe vedo,
La confessa el Piovan; ma ste cavale
Acusa i scapuzzoni de la Cale
168Ma quei del Sotoportego, no credo.
Ghe pratica per casa do' Francesi
Col brio de la Nazion tuta dolcezza,
Capaci de infiapir ogni belezza
172Con qualche idropisìa de nove mesi.
Polonia se dileta de piteri,
Ma quel che dona i fiori vorà el fruto,
E se de le so man la fa de tuto
176Ve lo pol dir chi gode i lavorieri.
Ogni zorno, che piova o che tempesta,
La visita un bon sior persona dota
Che paga ben i merli de la cota,
180E megio la pedana de la vesta;
Per devertir el scandalo sumario
Se dise, che l'è Munega acetada,
E che fratanto un Prete de contrada
184Ghe spiega su le rubriche el Breviario.
Diga però la birba veneranda,
Che ste Congregazion in certi siti
No le pol esser mai dei Sacri Riti,
188Che tuto sol finir in Propaganda.
Marieta è piena d'oro e de zechini,
Perle, zogie, mantò, busti e carpete,
Che se la vol un zorno far gazete
192No basta una tribù de Giacudini;
Senza gratificar qualche divoto
El diavolo no comoda i so' altari,
E certi paramenti singolari
196Vol dir: la grazia è fata, e sciolto el voto,
Betina xe più soda e più racolta
Dopo quela disgrazia sì famosa
De perder a una festa morbinosa
200L'onor e la manizza in t'una volta.
So nezza, inamorada coi latini,
Se fa insegnar da un Frate concordanze,
Ma zurerìa che avanti le vacanze
204La sa i futuri misti coi supini.
La fia del Masteler vedo in sconquasso
Confusa dal maron e da le dogie,
Cussì dopo che molti à messo a mogie
208O crepa el cerchio, o va el mastelo in fasso.
So' pare, che xe un omo de quei tondi,
Pensa de remediar co la pavèra,
Ma la sfesa ripiego più no spera
212Se le doghe davanti à roto i fondi.
Musa, basta cussì per dar un sagio
De sti basa-pilèle che à l'inzegno
Esposto sempre al colpo, al tiro, al segno,
216Come xe i morteri da bersagio.
Se vede sgangolir più d'un pupilo
A far sopa redoto col so' pianto,
E chi à magnà l'entrada se fa un Santo
220Che pianze tuto el dì da cocodrilo.
No tira più la Vedova el livelo,
Xe perso col Nodaro l'Istromento,
E sior Compare tira sie per cento
224Pagando un bezzo d'ogio al Capitelo.
Per racontar le furberìe segrete
Ghe vol altro che un pan de sete mesi!
Quest'è la carità dei Calabresi
228Robar i manzi e dar i corni al Prete.
Ghe vol altro che un Vesparo da Morto
A spegazzar l'usura d'un contrato!
Pol esser; ma nol crede gnanca un mato
232Ch'abia coscienza dreta un colo storto.
L'ingano sti furfanti chiama zelo,
Sussiego el fasto, e passatempo l'ira,
La rogna, sensual sangue che zira,
236E la furfanteria, voler del Cielo.
De l'Ipocrita infame, iniquo e tristo
Questa xe l'empietà, questi xe i modi,
Quest'è la so' moral: basar i chiodi
240E renovar le piaghe a Gesù Cristo.
Mio Dio, mio Redentor, Monarca eterno,
Sta razza fa conossere l'impegno
D'andar a ca del diavolo co inzegno,
244Piombar con bon esempio ne l'Inferno!
Signor, a seguitar la vostra frase,
Deboto no gh'è piegore che basta
Da travestir i lovi che le guasta
248E mete in confusion pastori e case.
Va machiando l'onor dei vostri Altari
Sta fezza abominevole d'abisso
Che a tanti ve fa pianzer crocefisso
252Con lagreme ateiste e da corsari.
Le più sagre funzion questa profana;
Ogni liogo è teatro dei strapazzi,
E Case e Chiostri e Betole e Palazzi,
256Sia la Corte Eclesiastica o Profana.
Quel Chietin mai no leva la portiera
Senza qualche Orazion giaculatoria,
Ma tuto quanto el filo de l'istoria
260Lo inaspa una pension ch'el santo spera.
In la Scuola infernal dei gabamondi
Osservo de le femene a montagne,
Che Fuste desarmae da le magagne
264Xe piene d'erba e cape soto i fondi.
Una finze vision degne de riso,
Un'altra vede un Anzolo in altana
Che strapianta lusverde e mazorana,
268E molte fa babao col Paradiso.
Taluna, dal Marìo cargà de bote,
Santifica el brusor e l'acidente
Col dir, a chi ricerca la inocente,
272Che la bastona i diavoli la note.
Certe visita Cristi e le Madone
E finze de zunar el marti e 'l zioba;
Chi fa tre passi a l'ora e se fa goba;
276Chi tira zo un Altar, chi le colone.
Altre ga un rosarion ch'ogni stracolo
Fa scantinar un fasso de madagie;
A l'ochio le par quei da l'antigagie,
280Al son mi le dirìa Birbe da nolo.
Molte portae da pizza religiosa
Va basando pianete ai Sacerdoti,
E dona soldi ai zaghi più devoti,
284Sforzo baron de carità pelosa.
Diverse tien Breviario longo e breve
E ghe ne dise in tuto una fazzada,
Al Ciel le dà, a ogni riga, qualche ochiada
288Come fa l'oche o l'anare che beve.
Fra tante solenissime Priore
Se trova qualche puta de capricio
Che mostra devozion, e l'è artificio
292Per andar in gatezzo a tute l'ore.
Xe modesto el vestir, devoto el passo,
Gravissimo el parlar, pien de dotrine,
Le par tante novizze Capucine,
296Ma tuto a fin de far d'ogn'erba fasso.
D'amor la credenziera tien coverta
Un velo atorno al busto sui cordoni,
Ma tante sera in portego i balconi
300E brama che la porta resta averta.
Taluna finze l'estasi de Chiara,
I gusti de Teresa, el cuor, le brame,
Sacrilega invenzion d'anema infame
304Che studia colpe e danazion impara.
Le sospira, ma un viso xe el motivo;
Le pianze, ma l'è un torto del Moroso;
Le prega, ma 'l fervor domanda un Sposo;
308E tuta l'Orazion xe in genitivo.
In conclusion l'Ipocrisia, confesso,
Xe un'empia enormità de chi no crede,
Sonifero infernal contra la Fede,
312Velen per ogni età, persona e sesso.
Orsù, benchè sia vasto l'argomento,
Musa, remeti pur le pive in saco,
La Predica xe al fin, l'inzegno è straco,
316No andar in Sagrestia, nè per Convento.
Vostra sia pur, Signor, l'anema pura
Che v'ama, adora e serve con schietezza,
E a chi ve sporze un cuor tuto dopiezza
320Ghe vegna anca el malano in sepoltura.
Benedeto sia pur l'omo onorato
Che dopo la sbrissada maliziosa
Vien a conti con Dio, paga la nosa,
324E fa saltar l'Esercito beato.
- Note a cura de Bartolommeo Gamba (1817)