L'ombra de Fornareto
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← El Taramoto | Edission e fonte ▼ | Insogno e Cabola → |
Al Comm. Avv. Leopoldo Bizio
'Na note, dopo fato quatro ziri
Mi tornava in barcheta a casa mia
Passando soto 'l Ponte de i Sospiri;
E su, de sora i Piombi, se sentia
Co l'aria che vegniva da marina
'Na campana sonar un'angonia.
Quando fora da quela portesina
Che va a finir ai Pozzi 1 sento un zigo
Che 'l pareva mandà da 'na bambina.
Me fermo, vardo, e: Chi xe là, ohe, digo!
Domando; ma nissun no me risponde;
E intanto che la barca al ganzo ligo,
Eco che vedo vegnir su da le onde,
De sangue pien che el fava infin spavento,
Un fantasma che subito el se sconde.
Sonava mezanote in quel momento...
Ve podè imaginar, fioi, co spagheto!
Solo che gera: e quando dir me sento:
— «So' Piero Tasca, deto el Fornareto;
E se, ti te ricordi de sto nome,
Ti gavarà sentio contar, o leto
Quela mia storia dolorosa, e come
In sbaglio condanà, col sangue mio
Gabia bagnà le mie inocenti chiome;
Ma quel che no ti pol aver sentio,
Vogio dirtelo mi, se ti me scolti...»
Mi, me vardava intanto avanti e indrìo,
De quà, de là, per aria e soto i volti
Del Palazzo Ducal, se 'na canagia
Fusse de quele coi çervei stravolti
Che i se la gode tanto a dar la bagia
A quei che driti va per la so strada
De sora, o soto el Ponte de la Pagia;
Ma el gera propio lu, là de fazzada
A le Preson, 'ndove che stava mi,
Sul muro, soto l'ultima feriada.
― «Se el Fornareto ti xe proprio ti,
(Mi ghe rispondo), come ti discori,
E te lo credo, povarin, ah, sì!
Còntime quele pene e quei dolori
Che sofrir te gà fato zo in quel buso
Quei bogie de aguzini e inquisitori.»
Lu, sugandose el sangue che dal muso
Scolava zo su la camisa azura,
Cussì el gà scominçià a contarme suso:
«Zo in-t'i Pozzi ghe xe 'na tana scura
Che farave spavento infin a 'n orso,
Ma no a chi gà la so coscienza pura.
Perchè ben ti lo sà che xe el rimorso
Che fa bruto parer un trono stesso;
Dunque, continuando el mio discorso,
In quela tana là mi so 'stà messo,
Senza aria e senza luse; e po' ogni zorno,
(Dal primo infin che gà durà el proçesso),
I me menava 'n'ora drento un Forno 2
A brustolarme sora un menarosto
Co tuti i Diese e st'altri bogie intorno,
Che disesse i voleva, ma a ogni costo,
Quelo che certo dir mi no podeva;
E sempre no, e po no, ghe gò risposto.
Alora i se arabiava, e i me meteva
Drento 'na morsa co tanto de denti,
E fin che no svegniva, i me strenzeva...
Insoma tuti i barbari tormenti
Che là ghe gera, mi, li gò provai;
Altro che 'l tifo, altro che el mal de denti!
Polsi de fero, màneghe, stivai,
Cavaleti col cugno, pie, caene,
Raspe, tanagie, e sponcioni infogai...»
— «Povaro Fornareto, le to pene,
Gà fato spasemar tute le età,
E l’onor ti gà avùo fin de le sene;
Invece quei che te gà condanà,
I xe desmentegai, o maledeti,
Ma el to nome in eterno el restarà.
Se ti savessi quanti Fornareti
Ghe xe anca ancùo da la Giustizia umana
Condanai inoçenti, povareti!
Ma dime: Prima de la to condana,
Come fàvistu a viver, povarin,
Imbusà come 'n lupo in quela tana?»
― «Ti pol imaginarte: un finestrin
Largo 'na spana, l'aria me mandava;
E gaveva 'na piera per cussìn.
La matina bonora, i me portava
Un toco de pan nero senza sal,
Che apena apena propio lo tastava:
E po' 'na broca de acqua; e manco mal
La fusse stada bona almanco quela,
Ma la pareva tolta in-t'el Canal...»
— «E xelo vero, o pur 'na fiaba xela
Che prima che ti andessi presonier
Ti ghe favi l'amor a 'na putela? »
Un poco el xe restà sora pensier
Vardando mi, che stava co le man
Pusae sul remo come un gondolier;
Po', dando un sospiron, povaro can,
El me gà dito: — «Si l'amava, e tanto:
Ma, per l'amor de Dio, parlemo pian.
Se ti savessi, zovenoto, quanto
Gò soferto per ela... per so amor
Più che per tuti i mii dolor gò pianto!
E qualo xelo el mal, qualo el dolor,
Dime ti, che ne fazza più patir
De le tremende malatie del cuor?
Quando pensava de dover morir
E lassarla ela sola quà in sto mondo,
No lo podeva sto pensier sofrir!
E de note là zò nel più profondo
Pozzo scavà soto acqua, quando gera
Indormenzà, quel'anzoleto biondo
El me diseva: Su, coragio, spera:
So' l'Inocenza, finirà ogni pena...
E mi me alzava su la freda piera.
El sangue me bogiva in ogni vena:
Chi xestu? domandava; ascolta!... (Ascolta?
No gera inveçe el son de la caena)!...
Maledeto quel fòdaro, e la volta
Che lo go tolto suso, e maledeta
La giustizia del Mondo cussì stolta!
Dise un proverbio: Chi la fà, l'aspeta;
E Venezia andarà sempre in malora
Fin che el mio sangue çigarà vendeta...»
— «Ti ga rason, ti gà; ma, dime: Alora
Come fàvistu a dir cussì securo
Che l'assassin sarave saltà fora?»
«Quando uno el xe d'ogni delito puro,
Ghe vien quel dono che gà avudo tanti
De indovinar le robe del futuro.
Eco perchè quel zorno che davanti
So' stà menà dei perfidi quaranta 3
Menà da un bruto bogia e diese fanti,
Gò dito: ― «No; e no passarà quaranta
zorni da ancùo che la mia inoçenza
conossarà venezia tuta quanta!» 4
Ma, quei stranati e po' de cani, senza
Darme bada, butai su le poltrone
De morte i me gà leto la sentenza.
E 'l zorno dopo, in mezo a le Colone
De Sa' Marco, in Piazzeta, tra 'na fola
De bravi e fanti, de omeni e de done,
Vista la gò, sa? povarina! sola,
Butarme un baso... Volea dirghe: adio!
Ma el bogia el me lo gà sofega in gola!»
Dito questo, el gà fato un caorìo
Soto acqua; e in quela xe vegnua la luna
A iluminar quel doloroso Rio.
Ah, Venezia, Venezia, degna cuna
De tante crudeltà, da i to spegazzi
A lavarte no basta la Laguna;
Spalanca, o Malamoco, i to Murazzi
Lassa che vegna drento el mar in modo
Che la se nega co i so bei Palazzi;
Perchè a mazzar el nobilomo Duodo
No xe stà el Fornareto che inoçente
La gà martorizà in sto bruto modo.
E questo lo diseva anca la zente;
Ma cossa val del Popolo la vose
Per chi giustizia nè pietà no sente?
Che el povarin xe sempre messo in crose! 5
- Note
- ↑ Pozzi, tetre prigioni della Repubblica Veneta, veri covi di belve feroci, situate nei sotterranei del Palazzo Ducale.
Si visitano tuttora accompagnati colle torcie a vento. Piombi, erano prigioni di Stato poste sotto il tetto di piombo del medesimo Palazzo. Furono in parte distrutti: si conservano soltanto le celle ove furono Silvio Pellico, ed Enrichetta Castiglione, che vi morì insieme collo sposo ed altri, vittime del Governo austriaco. - ↑ Nella prigione detta il Forno, si martorizzavano su carboni ardenti gl'indiziati di qualche delitto, per costringergli a confessare... Esisteva nelle Carceri della Paglia ora dette di San Marco, ed è precisamente la stanza che porta il numero 42, sulla porta della quale leggesi questa iscrizione:
PER PARTE PRESA FRA
CONSIGLIERI E CAPI DI
QVARANTA SVPERIORI
IL GIORNO 19. APRILE
1787. FV MVRATA LA
PORTA DI QUESTA CARCERE
DENOMINATA IL FORNO - ↑ Quaranta, magistrati che componevano la così detta Quarantia criminale, i quali giudicavano, o meglio, condannavano senza giudicare, tutti coloro che avevano la sventura di cadere, colpevoli o innocenti, in loro balia.
- ↑ Questo è il tenore del celebre monito che il Fornareto indirizzò ai giudici che lo avevano condannato a morte innocente.
- ↑ In quest'epoca che gli errori giudiziari sono tanto frequenti, si è osato da certi pseudo eruditi o spolvera scaffali, per la solita mania di voler tramutar le leggende in storie, o le storie in leggende, mettere in dubbio, e quasi negare la storia infelice di Pietro Tasca, detto il Fornaretto. Non occorre ricordare Dreyfus, la cui causa interessò l'Umanità; ai Veneziani basti il ricordare il caso Montanari, che condannato all'ergastolo per parricidio, venne poscia riconosciuto innocente per l'opera precipua e solerte dell'illustre oratore, cui è dedicato questo componimento.