L'ossessa

by Giovanni Battista Bada

3 L'ossessa Giovanni Battista Bada XIX Poesie

Indice:Raccolta di poesie in dialetto veneziano 1845.djvu

Giovanni Battista Bada

L'ossessa

XIX secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

L'OSSESSA.

Una fia d'un vilan, che no gaveva
     Che disdoto vint'ani, alquanto bela,
     Ma un pochetin sempieta,
     Le convulsion pativa, e povereta
     5Co ghe vegniva el mal ela faceva
     Dei moti convulsivi e stravaganti,
     Che meteva paura ai circostanti.
In un dì del so mal, disea sti tai:
     Questi è moti da veri indemoniai:
     10Oh povera putela!
     La fa pecà: vardela
     Se no l'è spiritada?
     Senz'altro xe sta tosa indemoniada.
Oh come la se trà
     15Meschina qua e de là!
     Come la ciga forte!
     La ga le carne morte,
     Ossessa l'è sicuro,
     La dà la testa al muro,
     20La fa mile sberlefi:
     Oh Dio, che bruti cefi!
     Sentì... la se lamenta:
     Un diavolo sicuro la tormenta.

Essendo alora in setimana santa,
     25Quela zente à deciso tuta quanta,
     Che a Venezia la fusse da menar
     Per farla el zoba santo sconzurar.
Eco donca che in bota
     Qua a Venezia i l'à condota.
     30Apena in chiesa de san Marco intrada
     Sta povera suposta spiritada,
     Per delirio fatal,
     Ghe xe vegnù el so mal,
     E a cigar la s'è messa;
     35Cussichè tuti l'à credesta ossessa.
Uno che sapia sconzurar ghe vol,
     Et eco Piero Samo barcariol,
     Che a forza de cigar
     Se pretendeva i diavoli scazzar.
     40A vicina elo donca a la regazza,
     Ga dito: Poverazza!
     Questa xe, no gh'è dubio, spiritada:
     E fandoghe la crose el l'à segnala,
     Disendo: Fora, fora
     45Da la parte de Dio
     «Scelerato demonio iniquo e rio.»
Ma sta regazza ancora
     La urlava, la cigava,
     Che compassion la fava,
     50E sempre el barcariol co santo zelo
     Cigava: Fora, fora
     In to tanta malora
     «Scelerato demonio iniquo e felo;»
     E andava via tocando
     55La puta qua e de là de quando in quando.
E per qualche mumento
     L'è andada in svanimento:
     El che la fava creder liberada,
     Ma ga dà l'esorcista una vardada,
     60Disendo: no xe vero,
     La lo ga in corpo tuto quanto intiero.
     E parlando a quel diavolo co sdegno
     Ga dito: Vogio un segno;
     Ti me vol cogionar ma no te credo:
     65No son minchion, e vedo
     Che in sto corpo ti è ancora:
     Onde presto va fora,
     E dame avanti un segno,
     «Scelerato demonio iniquo e indegno.»
70In quelo dal sopor
     La s'è come svegiada, ma in furor,

     Dando un pugno a sto tal tanto potente,
     Che ga fato saltar de boca un dente;
     E co sto segno alora
     75No 'l diavolo, ma el dente è vegnù fora.
          El creder a sti ossessi veramente
          No xe degno del secolo corente,
          Ma un'ignoranza crassa
          Ancora resta ne la zente bassa.