Lètera dedicatoria
|
Edission original: |
Marco Pescante, Saggio di poesie veneziane, Venezia, dalla tipografia di Luigi Plet, 1835 |
|
Fonte: |
| Edission e fonte ▼ | POESIE DI VARIO GENERE → |
ALL'EGREGIO
SIOR ANZOLO FRASSINE
Marco Pescante
Un Poeta, che ga fama,
Qua a Venezia vivo e san,
Tempo fa à voludo vèdere
4Dei mii versi in venezian.
El li à leti, el m'à dà un baso;
Pò el m'à dito tal e qual:
Bei, sior Marco, sì per baco,
8Bei dasseno, no gh'è mal.
La li stampa... oh! cossa vorla?
Go risposto, no gh'è caso;
Mi d'esporme a la berlina
12No sarave persuaso.
La li stampa, mi ghe digo,
L'à sogiunto el bon signor,
E mi fermo, cara ela,
16De stamparli no go cuor.
Cossa vorla che m'espona
A far ridarme dal mondo
Co dialetiche rimazze?...
20No le xe fandonie in fondo?
Qualche volta me diverto
A cantar in venezian,
Ma so fare qualcosseta
24Anca mi nel bon toscan.
Perciò penso, che piutosto
De stampar da barcarol,
Se i vorà, co sarò morto
28Che i me stampa come i vôl.
Fazza alora paze, o guera
El mio povero archivieto
Co Venezia e co Firenze,
32Mi per mi dormirò queto.
Quel che ò scrito in bon linguagio
Ben gnancora no me quadra,
E de scrivarme el bon tempo
36Me lo tol la sorte ladra.
Eco qua, per tuto questo
Go risolto de aspetar
Prima d'essere dal Publico
40Criticà col mio stampar. —
Xe passadi varj mesi
Da sta scena, e l'altro dì
Sto sior tale el trovo a Padoa,
44El el me dise, qua da mi.
A un ridoto de scolari
El me mena, e là... (che cade!)
Là ale curte i me costringe
48A stampar ste mie lunade.
Ma lunade ghe n'ò tante
Per la testa ogni momento,
Che se stanca, e se disanima
52El mio povero talento.
Per sta impresa go bisogno
D'un valente Mecenate,
Che susidia le mancanze
56D'una Musa Dona-Cate.
Ah! perciò ricoro a Vu,
Caro amigo del mio cuor,
Chè con Vu da tanto tempo
60Cambio e nutro stima e amor.
Vu se' un'otima Persona
Dai più boni rispetà,
Vu se' un Omo de giudizio,
64Vu savè come se fa.
Perciò a Vu me racomando,
Protegème in sta facenda;
La scarsezza del'oferta
68Per pietà che no ve ofenda.
Mi in ricambio ve protesto
Gratitudine fedele;
Zà savè che son sincero,
72Zà savè che no go fiele.
E concludo finalmente,
Protestando in bon ingiostro,
Che per mi l'unica lena
76Xe el favor del Nome Vostro.