La Palla
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Trovandose in campagna,
Ne la stagion de istà,
Certe Signore un dì le s'à pensà
De andar a visitar
5Un certo Matematico
Che in vila, e da so posta, usava a star,
Curiose de osservar
Cossa gera sto tomo,
E veder se l'è un omo.
10Queste xe donca andae
Tute linde e slissae,
Co quel'aria e quel ton
Che xe soliti a far dei cuor carbon.
Co le xe stae al porton
15Le l'à fato avisar,
Che alquante signorine xe curiose
De veder le so machine studiose;
E lu ga fato dir,
Che le gera parone de vegnir.
20Quando le xe stae là
Co molta gentilezza el ga mostrà
I sistemi celesti,
Secondo la opinion
De Galileo, Copernico e Neuton,
25Fati tuti de legno o de carton;
E che co certi inzegni se moveva,
Come i fa in ciel, a quel che lu diseva.
Le machine pneumatiche,
Le machine areostatiche,
30Quele d'eletricismo,
E prismi e lenti, e sin el magnetismo.
Ste Signore vardava,
E ogni tanto d'acordo le criava;
Oh cospeto! cospeto!
35E po le replicava:
Oh cospeto! cospeto!
E 'l sapiente s'avea secà el culeto.
Dopo averlo lodà
Le ga anca dimandà
40Se mai l'aveva amà;
E lu à dito: — Ò zirà,
Ma no me son fermà.
Le s'à maravegià,
E le ga dito senza complimenti,
45Che per el più sti bravi, sti studenti
Xe zente senza cuor.
Ma el nostro professor,
Senza dirghe un de no, nè adurghe prove,
El le conduse dove
50Ghe gera un bel taolin
Fato tuto de legno serpentin,
Sora del qual ghe gera situada
Una bala d'avorio
Tuta quanta miniada.
55Ghe gera piturada,
Costanza, volutà,
E amor, e fedeltà,
E cent'altre istoriele,
Che gera tute bele.
60Essendo egual el pian,
E la bala perfeta,
Dandoghe un fià de moto co la man
La bala no restava mai più quieta;
Ste piture a vicenda se vedeva,
65E 'l gera un zogolin che ghe piaseva.
Invece de Cospeto,
Le diseva: L'amor! o benedeto!
Volutà! cara!... fedeltà!... l'amor!...
Vardè le Grazie... oh bele! e quela, e questo...
70Ma lu s'avea seca de novo el cesto.
E dimandando senza afetazion
Se ghe piaseva l'ultima invenzion: —
No se dà de più belo e de più bon
(Tute quante d'acordo ghe conferma)
75Ma quela bala che no sta mai ferma
Xe un gran difeto; e no poder gustar
Le bele piturete
Ch'el ga fato miniar....
Ma s'à sentio el filosofo a criar
80Con una osona, ma de quele rare:
La dovevi fermar, done mie care.
Cussì se ghe pol dir a tante e tanti,
Che dise che no gh'è cuori costanti.