La Riunione
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
Silvia, la bionda Silvia,
Che un tempo de sto cuor
Xe stada la delizia,
4Che m'à imbriagà d'amor,
Lusendo in ciel chiarissima
La luna a mezzo istà
Sui fiori e l'erba tenera
8S'avea co mi sentà.
Nè 'l tempo, nè altre Veneri,
Nè quel tremendo sì
Avea la bela imagine
12Mai scancelada in mì.
Fissi un co l'altro, imobili,
Se stevimo a vardar,
El cuor sentiva a baterme,
16Ma no podea parlar.
Alfin co un'ose languida,
Che ben facea capir
La situazion de l'anema,
20Cussì m'ò messo a dir:
Questa è quel'acqua limpida
Che semo andai ti e mi
A scaturar i gamberi;
24No è vero? e Silvia: — Sì.
E là, da drio quei alberi
Che la se va a stagnar,
Xe dove che quel'anera
28Ti m'à mandà a chiapar;
Che tropo cocolandola
Tanta gran rabia ò bù,
Che voleva mazzartela...
32Te recordistu più?
Che dopo benedivimo
Le colere d'amor,
Che in dò nu no sentivimo
36Che un'anema, che un cuor?
I gran momenti, Silvia!
Ch'i n'abia più a tornar?
Ela un'ochiada tenera
40Lassa su mi cascar.
Alora strucolandoghe
La man, digo: Mio ben,
Come in quei dì, assicurite,
44Arde per ti sto sen;
Ma ti?... Quele to' lagreme
Voriele forsi dir,
Che l'amor te rimprovera,
48Che ti torni a sentir?
Ah! pensa, che 'l primissimo
Son che ti gh'à zurà
In quei zorni beatissimi
52Eterna fedeltà;
Che quel dover teribile
Che t'à sbregà da mi
Per quatr'ani continui
56Ga tossegà i me' dì;
Che da la mia memoria
Mai n'ò savù scazzar
Quele to tante grazie,
60Quel soave parlar:
Mai quei cavei finissimi,
Quei laveri de miel,
Quel bel ochio ceruleo
64Che me ricorda el ciel:
Pensa... Ma interompendome,
Senza però parlar,
Da quela man bianchissima
68Me sento a slontanar.
Oh Dio!... mortificandome,
Dopo de aver slanzà
De le ochiae languidissime,
72Che diseva, pietà,
Ai pie de la mia Silvia
Za gera per morir...
Amor un tal spetacolo
76No gà possù sofrir.
Quela tremenda fiacola
L'à fato sbampolar:
La luna in t'una nuvola
80Se xe andada a serar.
Un fogo vivacissimo
S'avemo sentio al cuor,
Son certo che se amevimo,
84Se no, coss'è l'amor!
Come po' che se amessimo,
Cossa de nu sia stà,
Mi no savaria dirvelo:
88Domandèghe a quel pra.