EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 16 modifica]


La baba


     Tuto el giorno la brontola, per ela
No va ben niente, tuto xe mal fato,
La ghe taroca sempre a la putela,
Guai se un momento la careza el gato.

     La serva, disgraziada, no fa tela,
La devi lavorar proprio a contrato,
Vien zo la casa, vien, orca mastela!
Se per fatalità la rompi un piato.

     Tuto devi esser lustro come un specio,
E se me intrigo mi, zito! la ziga,
Protetor dele serve, bruto vedo!

     Pensa ai tui fati, qua son mi parona!..
Ma in segreto bisogna che ve diga
Che la xe in fondo una gran brava dona.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_baba_(1915)&oldid=69309"