La biondina in gondoleta
|
1788
|
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
La Biondina in gondoleta
L'altra sera gò menà,
Dal piacer la povereta
4La s'à in bota indormenzà.
La dormiva su sto brazzo,
Mi ogni tanto la svegiava;
Ma la barca che ninava
8La tornava a indormenzar.
Fra le nuvole la luna
Gera in cielo meza sconta,
Gera in calma la laguna,
12Gera el vento bonazzà.
Una sola bavesèla
Sventolava i so caveli,
E faceva che dai veli
16Sconto el sen no fusse più.
Contemplando fisso fisso
Le fatezze del mio ben,
Quel viseto cussì slisso;
20Quela boca e quel bel sen,
Me sentiva drento al peto
Una smania, un missiamento;
Una spezie de contento
24Che no so come spiegar.
So' stà un pezzo rispetando
Quel bel sono, e ò soportà,
Benche Amor de quando in quando
28El m'avesse assae tentà;
E ò provà a butarme zozo
Là con ela a pian pianin;
Ma col fogo da vicin
32Chi averia da ripossar?
M'ò stufà po' finalmente
De sto tanto so dormir,
E gh'ò fato da insolente,
36Nè m'ò avudo da pentir;
Perchè, oh Dio, che bele cosse
Che gh'ò dito, e che gh'ò fato!
No, mai più tanto beato
40Ai me' zorni no son sta.