La boca fresca
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← La caseta perseguitada | Edission e fonte ▼ | El materialon → |
LA BOCA FRESCA
Lo cognosseu quel chimico-droghier
Che ve starave a tola tuto el zorno,
Ch’in do e do quatro ve destriga un forno
E che trinca molandose 'l braghier?
Che ne la so fusina da spicier,
In gran traversa e gran bareta a corno,
Fra diese amici che bacana intorno
El ve sa far da cogo e pastizzier?
Che sa i boconi sgrafignar più grossi
Da la pignata o da la cazzarola,
E in do minuti no gavè che ossi?
Portèghe mo a disnar una balena
Ch’abia magari un altro Giona in gola:
No la ghe bastarà gnanca da cena.