La campana del convento
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Cavalcada de Romeo | Edission e fonte ▼ |
La campana del convento,
col batocolo1 par aria,
mèsa fora e mèsa drento
de la lòsa2 campanaria...
Drin, drin, drin!
Tuta lustra e tuta brava,
col fratin che la tirava
co' 'na forsa straordinaria,
la sonava matutin...
Nel convento scuro, scuro
sensa luna e sensa stele,
se vedea speciarse al muro
i lumeti de le cele...
Din, din, din...
J'era ombrie che se segnava,
j'era frati che pregava
co 'na calma straordinaria
la Madona e el so bambin.
― O colonete sutile sutile:
Come cresse el dolor de sta fameia?
― È arivado Romeo, bianco de bile
e Giulieta l'è a drio che la se sveia.
O poeta zentil, stè in là dal muro,
che in meso ai morti no ghe vol sussuro;
e quando s'è arivadi a la so ora,
dai camposanti no se vien più fora!...
«Qual bon estro và dito vita mia
la strada giusta del vegner quà drento,
che la più granda e perfida angonia
tuto de colpo s'à voltà in contento?
Dunque, quei del convento
ve l'à fata saver la me busia...
Si vegnù come el vento,
no badando più a gnente,
par sentarve quà arente,
par poder starme la note vissin...
Sentì sentì fin che ghe l'ho in la mente,
sentì, che sogno del me rosmarin....»
. . . . . . . . . . . . . . . .
Un cicì!
Qualche foia che se move,
i grii, che cria par la rosà che piove,
le ròndene che porta brute nove
da cissà mai quale gronde lontane...
Altri segni, altri boti de campane,
i putei che se sveia da le nane...
Ah se capisse, che anca el mal più fondo
no cambia facia a nissun roba al mondo!
Trema le piante come veci fiachi
dopo una vita tribulada atorno
par afari de soldi o de passion,
e gh'è le stele co i ocieti strachi,
e ghè la luna, che ve dà el bon giorno,
par mostrar la so bona educassion...
Sona in castel la sveia ai militari,
riva i primi bandoti3 de i latari,
vèrse i becari, e quei che ha coto el pan...
Se sbianchèsa le strade e va contenti
i manuai che sìfola4 tra i denti,
col cor in passe e la polenta in man!
- Note