La lontananza (Anton Maria Lamberti 1817)
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
Come el vilan l'istà,
Ch'el calor gh'à arsirà
3L'erba e le biave,
Brama l'acqua dal ciel,
Che più dolce del miel
6Per lu sarave;
Come che un pelegrin
Brama vederse alfin
9D'un longo viazo;
E che un interessà
El tesoro trovà
12Lo brama al sazo;
E come chi xe in mar,
Dopo un gran navegar
15Sospira el porto;
E come brama san
La mare el fio lontan,
18Solo conforto:
Come el Sol el Lapon,
La libertà el preson,
21L'orbo la luse;
Con un istesso ardor
A bramar quel to cuor
24Amor m'induse
Con un istesso? nò
De più bramar lo so,
27Più lo sospiro.
Quei altri, a delirar
No i vedo e angonizzar
30Senza respiro:
Mi sì, che sento in sen
E le fiame e 'l velen,
33Nè go un conforto.
Quel che zavaria in mar
No vorave trovar
36La morte in porto;
Nè 'l pelegrin vorà,
Dopo aver ben strussià,
39Patria e caena;
Nè veder l'orbo el ciel
Per no bever che fiel
42Disnar e cena.
Mi, del to cuor paron,
Aceto la preson,
45Morte disprezzo.
Credilo, cara, sì,
Ogni ben l'è per mi
48Ben senza prezzo.
Ma come che l'amar
Ne fa spesso cascar
51In tel delirio!
Sospiro per amor,
Desidero el to cuor.
54Perchè sospirio?
No me l'astu donà,
E no m'astu zurà
57Mai torlo in drio?
E vero, sì, mio ben,
Ma ti è lontana, e in sen
60Ti 'l ga col mio.