La mancanza di ardire
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
Quanto tempo s'aspeta un'alegrezza
Che apena l'è vegnua che l'è partì!
Òi mai provà meschin d'una richezza
Che me fazza star ben intiero un dì?
Volse custìa, dopo tanta fierezza,
Al fin avere compassion de mi,
Ma a l'infinita mia dolcezza
Me manca quel che m'importava pì.
Se ghe son stà vicin perso ò l'ardir,
Persa presso al mio ben ogni possanza;
Quasi ferìo che staga per morir!
Ch'òi più da far del viver che me avanza
Se è vegnù quel che no dovea vegnir
Per tagiarme a traverso ogni speranza?