La neve
|
Edission original: |
Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910 |
|
Fonte: |
Indice:Selvatico - Commedie e Poesie Veneziane, Milano, Treves, 1910.pdf |
| Edission e fonte ▼ |
Parona, la casca!
La varda che fiochi!
La casca, la taca,
La vien a balochi.
Che gusti, che godi!
La taca e in altana
I copi coverti
Par piati de pana:
De pana, parona,
E ben preparai,
Che tuti i camini
Xe storti impirai.
Che gusti, che godi!
Da basso el campielo
La varda co lisso,
Co bianco, co belo,
El par una torta,
Dasseno che mora!
Co’ tuta la giazza
Butada per sora.
El pozzo de mezo?
Oh caro! un budin
Coverto pulito
De zucaro fin.
Mi solo a pensarghe,
Bisogna che ingiota;
Parona, la tasto?
Oh cagna, la scota!
La scota e l’è giazzo,
Vardè che barona!
L'è proprio compagna
Del cuor de la dona.
Oh Dio! ma che sgrissoli,
Devento un sorbeto;
Parona, coremo,
Fichemose in leto.
Coremo, parona;
La varda, oramai
In scufia da note
S'è messo i ferai.
Oh Dio che delizia!
Sentir sto supieto
E intanto voltarse,
Niciarse al caldeto.
Che gusti, che godi!
Go caldo e xe giazzo,
Go el cuor che me sbisega,
So tuto un tremazzo,
Perchè — ghe lo digo,
Parona, in scondon
Ancuo Colombina
Co’ un far cocolon
Tremando dal fredo,
M'à dito cussì:
Se dura sta neve,
Me scaldistu ti?