La più bela Dôna de Treviso
|
Edission original: |
Marco Pescante, Saggio di poesie veneziane, Venezia, dalla tipografia di Luigi Plet, 1835 |
|
Fonte: |
| ← XIII. La Morte | Edission e fonte ▼ | XV. La Protesta → |
DE TREVISO
XIV.
Treviso! ma quanto
Me piase Treviso!
La xe un paradiso
4La so società.
Che bone persone!
Che bele putele!
Le par tante stele
8D'un cielo d'istà,
Che modi gentili
Che ga i Trevisani!
Xe più de sie ani
12Che i pratico mi,
E digo ch'i è boni,
Che l'è un malendreto
Colù che indiscreto
16No dise de sì.
E po, che coltura!
Che fiori d'inzegno!
Che popolo degno
20De stima e d'amor! —
Nel so material
Se po sto Treviso
Nol xe un paradiso,
24Ghe fa tropo onor
Quei cari contorni
De bela verdura,
Nei quali natura
28Fa più che la può.
Perchè sule basse
Se vu me disè
Che megio ghe xe,
32Mi digo de nò.
Se sa che più in suso,
E Padoa, e Bassan,
De qua Conegian,
36De là el Bachiglion
Xe loghi assae beli,
Ma importa, e no importa
Se questo lo porta
40La so situazion.
Treviso per altro
Xe in tuna pianura,
Ma qua la natura
44Fa più che la può;
E el so teritorio,
(Lasagne no conto)
Può starghe al confronto...
48Xe vero sì, o nò?
Ma perderse a cossa
Sul so material?
Vardemo el moral,
52La so Società.
Che bone persone!
Che bele putele!
Le par tante stele
56D'un cielo d'istà.
Che modi gentili
Che ga i Trevisani!
Che dolci! che umani!
60Che cuor! che virtù!
Ah! sì — i forestieri,
Che zira a Treviso
No può, ve l'aviso,
64Bramarse de più.
Per altro ascolteme...
Scoltè un galantomo:
(Mi parlo da omo
68Che parla col cuor:
Al belo mi sempre
Vôi farghe giustizia ..
Go poca malizia,
72Ma sento l'amor.)
Se anca Treviso
Come una bicoca
Da zente marzoca
76El fosse abità;
Se poco l'avesse
De bon nel bel sesso,
Treviso l'istesso
80Sarave stimà;
Perchè lu possede
D'amor una frezza,
Che dela belezza
84L'è proprio el campion.
Sì, quanti la vede
Genieti simpatici
Li sento zà estatici
88A darme razon.
Sta frezza d'amore
La xe una Signora
Ch'el cuor m'inamora
92Per molta beltà.
Che Flora? che Psiche?
Che Venere mai?
Più bela d'assai
96La xe questa qua.
Ghe n'è qua a Treviso,
Sì, molte moltissime
De bele belissime,
100L'ò dito e el dirò;
Ma questa xe come
El sole nel cielo,
Trovar de più belo
104Qua intorno no so.
Ah! nò, no se trova
In tuto Treviso
Un altro bel viso
108Vezzoso cussì.
Ah! nò, no se cata
Qua drento in ste mura
Un'altra creatura
112Più bela de ti.
Nineta mia cara!...
Ti è tì, mia dileta!
Per mi, benedeta,
116Ti è un fior de beltà.
Che fronte! che cegie!
Che boca! che naso!...
Eh... mi, no gh'è caso,
120Mi so inamorà.
Che aspeto!... che fianchi!...
Che grazia!... che doni!...
Che ochi baroni!...
124Che brazzo!... che piè!...
Che cioche d'amore!...
Che colo de neve!...
Per dirtela in breve,
128Ti è degna d'un re.