La regata veneziana

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora bisogno de qualche sistemada. No xe stà indicà l'edission cartacea da cui vien el testo.

Francesco Maria Piave

La regata veneziana
Tre canzoni in dialetto veneziano

musicà da Gioachino Rossini in “Péchés de vieillesse. Vol. I Album Italiano”

XIX secolo

Edission original:	nissuna edission indicà
Fonte:	http://www.recmusic.org/lieder/assemble_texts.html?SongCycleId=966

Edission e fonte ▼

I. Anzoleta avanti la regata

Là su la machina¹ xe la bandiera,
varda, la vedistu, vala a ciapar.
Co quela tornime in qua sta sera,
o pur a sconderte ti pol andar.
5In pope, Momolo, no te incantar.
Va, voga d'anema la gondoleta,
né el primo premio te pol mancar.
Va là, recordite la to Anzoleta
che da sto pergolo te sta a vardar.
10In pope, Momolo, no te incantar.
In pope, Momolo, cori a svolar.

II. Anzoleta co passa la regata

I xe qua, i xe qua, vardeli, vardeli,
povereti i ghe da drento,
ah contrario tira el vento,
4i gha l'acqua in so favor.

El mio Momolo dov'elo?
ah lo vedo, el xe secondo.
Ah! che smania! me confondo,
8a tremar me sento el cuor.

Su, coragio, voga, voga,
prima d'esser al paleto²
se ti voghi, ghe scometo,
12tutti indrio ti lassarà.

Caro, caro, par che el svola,
el li magna tuti quanti
meza barca l'è andà avanti,
16ah capisso, el m'a vardà.

III. Anzoleta dopo la regata

Ciapa un baso, un altro ancora,
caro Momolo, de cuor;
qua destrachite che xe ora
4de sugarte sto sudor.

Ah t'o visto co passando
su mi l'ocio ti a butà
e go dito respirando:
8un bel premio el ciaparà,

sì, un bel premio in sta bandiera,
che xe rossa de color;
gha parlà Venezia intiera,
12la t'a dito vincitor.

Ciapa un baso, benedeto,
a vogar nissun te pol,
de casada, de tragheto³
16ti xe el megio barcarol.

Note a cura de Wikisource

↑ La "machina" sarìa un baldachin de legno sistemà sul Canal Grande tra Palazzo Balbi e Ca' Foscari, dove finisse el percorso de la regata. Su sto palco ciapa posto le autorità venexiane e le ghe dà el premio al vincitor.
↑ El xe un paleto piantà in mezo al Canal Grande vissin a Santa Chiara, intorno al quale ga da oltar le barche.
↑ A Venexia na olta ghe jera do tipi de gondolieri: quei che laorava soto paron par qualche fameja siora (i barcaroi de casada) e quei che fasea invesse da "tragheto", i xera cioè i tassisti de l'epoca.

[1] La "machina" sarìa un baldachin de legno sistemà sul Canal Grande tra Palazzo Balbi e Ca' Foscari, dove finisse el percorso de la regata. Su sto palco ciapa posto le autorità venexiane e le ghe dà el premio al vincitor.

[2] El xe un paleto piantà in mezo al Canal Grande vissin a Santa Chiara, intorno al quale ga da oltar le barche.

[3] A Venexia na olta ghe jera do tipi de gondolieri: quei che laorava soto paron par qualche fameja siora (i barcaroi de casada) e quei che fasea invesse da "tragheto", i xera cioè i tassisti de l'epoca.

1

2

3