EPUB   MOBI   PDF   RTF   TXT
Qualità del testo: sto testo el xe stà trascrito e rileto.
[p. 41 modifica]
LA SAGRA DE L'ORO

Al Senatore Gen. Emilio Castelli.


Donélo quel'oro
tolélo dai scrigni,
no 'l xe più un tesoro
4in tempi ferìgni....

Se sola una pena
solèva un zogélo
doné la caéna,
8doné anca l'anélo.

I serve del sangue
prezioso a salvàr:
un omo che langue
12pol l'oro sanàr!

O spile, o recini,
o bei bracialeti,
medàgie, manini,1
16anéi, pontapéti,

[p. 42 modifica]


vu che tante bele
savévi adornàr,
e sora la pele
20più bianca brilar,

e vu che più sordi
se salva e più avari,
o veci ricordi
24dei morti più cari,

o antighi zechìni,
o napoleòni,
a nobili fini
28ancùo saré boni!

Un novo tesoro
San Marco combìna,
davanti a quel'oro
32donà se se inchina.

La zeca in sonante
monéda lo bate,
l'erario é abondante,
36più gnente lo abate.

[p. 43 modifica]


El gran delinquente
sarà trasformà
in carne nutriente,
40in pan pel soldà!

O spose, o putèle
ga assàe più splendor
de le cadenèle2
44el vostro bel cuor.

Se coi bracialeti
se fonde un canòn,
i brazzi perfeti
48par çerto più bon.

Xe senza recini
le recie, ma i biondi
cavéi xe più fini;
52sui oci profondi

le làgrime brila
ben più dei diamanti;
e le man tremanti
56le cuse, le fila....



Note a cura de l'autor
  1. Catene d'oro di Venezia.
  2. Catenelle.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_sagra_de_l%27oro&oldid=42277"