La secretezza delle Massere
|
Edission original: |
Giovanni Battista Casti, Scherzi poetici di vari celebri autori italiani e veneziani raccolti da G.B.C., Venezia, Tip. Molinari, 1834 |
|
Fonte: |
Indice:Scherzi poetici di vari celebri autori italiani e veneziani.djvu |
| Edission e fonte ▼ |
Alle cinque de mattina
La Pasquetta e la Tonina,
Do servete benedete,
D'un canon manco secrete,
Sulla porta donna Catte
Le aspettava dalla latte.
Per no star cussì de bando
Le se mete ciacolando,
A dir ben de i so paroni,
Che i xe onesti, che i xe boni,
Ma che un poco i xe ristretti,
Per esempio ... tegnosetti.
Che per altro, delicate
Elle el becco no le bate,
No le parla se i le indora,
Anzi invece alla malora
Volentiera le stramanda
Chi ghe fa qualche domanda.
Se no fusse la parona
Un pocheto ciacolona,
Dise Pasqua alla Tonina,
La saria cossa divina,
La gà un fià de nervoseto...
Ma pazienza, l'è secreto.
Se sentissi qualche volta
Che [..]urco, che raccolta
De smorfiezzi, e che cagnera,
Che mi misera massera
No farave, e no par diana,
Se i me fazze una Sultana.
Co i se quieta, e cò i fa pase,
Quando in tuuto i se compiase,
Mi de guardia sempre resto,
Mi ghe digo, mi ghe pesto,
Mo da bravi, mo de dia
No le rompa... l'armonia.
S'el paron vegnisse a caso,
Me schiarisso e supio el naso,
E in sto modo poveretto
In pericolo nol metto,
De imparar quel che nol sa...
De toccar la verità.
Ma credeu che per sti affari
Chiapa mai qualche do trari?
Figureve el so moroso,
El ze un africa, un tegnoso;
Una roba, una seccada...
Tonia mia, son stomegada.
Mi per altro no ghe penso
De ottegnir nessun compenso,
Mi no parlo se i me copa,
Gò una cottola de stopa,
Ma gò un'anema più fina,
Più de qualche cittadina.
Ghe risponder a sta secreta
La Tonina più discreta;
Anca mi benchè li lodo
I paroni, no me godo
Che i me tratta come un can,
Struscie molte e poco pan.
Sgangolisso el me salario,
Per vestirme me savario,
Son spessissimo obbligada
A portar qualche ambassada
E cò ben m'ò descunio
Chiapo un grazie, e andè con dio.
I ninzioi mi ghe tacono,
Ranco, struzio, e no minchiono,
Mai che veda a vegnir via
Un tantin de cortesía;
No pretendo minga un stato...
Qualche quarto de ducato.
Ma co tutte ste cagnere,
Posso dir che de massere
Più fedeli e pia secrete,
Più onorate e più discrete,
Disè pur quel che volè,
Più de mi no ghe ne xè.
Dopo averse là in confuso
Mille cosse dito suso,
Passa proprio donna Catte,
E la ciga voleu latte,
La le ferma... le contrata...
Do parole le barata.
La provista terminada,
Le se dà una saludada;
Sora el tutto le se dise,
No parlè, le mie raise,
Tegnì duro, tegnì streto,
In te l'anema... el secreto.