La serva nova
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Quadreto a ogio | Edission e fonte ▼ | Metà-fisica → |
La serva nova
Scura de carnagion, neri i cavei
e spessi e folti come na foresta,
oci castagna scuri e sora a quei
do segie fate col carbon. — Xe questa
de la mia serva la stupenda testa
senza contarve che la ga do nei,
uno sul colo e un altro che ghe resta
in fianco de un bochin, ma dei più bei.
Geri matina par la prima volta
mentre la scominciava a far servizio,
ghe dixe mia muger co impero: Ascolta,
se ti vol star co mi, gabi giudizio.
E in quela Cate co na furba ociada
m'à scoverto del çiel 'na nova strada.