La sonambola
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El vero sistema | Edission e fonte ▼ | In morte d'una massera → |
Quela celebre fada bolognese
Che sera i oci per veder più ciaro,
Mete in saco San Piero, San Genaro
E tute le reliquie de le ciese.
La ve fa più miracoli in un mese
Che in un secolo i bagni de Recuaro,
E se pol dir che 'l so talento raro
Assae più val d'un boridon1 franzese.
Lezer la sa nei libri del futuro
Sta gran Sibila, e franca l’indovina
De l’anema i secreti e dei buei.
Qualunque altar la ve scoverze a scuro:
Basta mandarghe in una cartolina
Cinque grame lirete e do cavei.
Chi no gavesse un pel sora la zuca
Pol spedir soto fassa la peruca;
Solo v'averto, per el vostro ben,
Che senza i bori l'estasi no vien.
- Note
- ↑ Parabolano.