La spatola

by Arrigo Boito

3 La spatola Arrigo Boito XIX Poesie

Indice:Poesie veneziane scelte e illustrate da Raffaello Barbiera, Firenze, Barbèra, 1886.pdf

Arrigo Boito

La spatola

XIX secolo

Edission original:	Poesie veneziane scelte e illustrate, a cura de Raffaello Barbiera, Firenze, Barbèra, 1886
Fonte:	Indice:Poesie veneziane scelte e illustrate da Raffaello Barbiera, Firenze, Barbèra, 1886.pdf

Edission e fonte ▼

LA CANZON DE LA SPATOLA. ¹

                              La spatola
                                   ossia
          L'arte de menar ben la polenta
                    E de metterghe el tocio ²
                              Allegoria
                    De Arlechin Batocio
          Moreto bergamasco³ e mezo mato
          El qual la ofre dedica e presenta
          Ai omeni politizi de stato.

     Ghe xe una caldiera⁴ ― tacada⁵ su un fogo
Che par una vampa ― de incendio o de rogo,
Visin ghè una polvare, che par d'oro fin,
E qua ghè la spatola del gran Trufaldin.
Principia el miracolo.... Se vede de drento
Levarse una brombola,⁶ d'arzento d'arzento,
Po' subito un'altra la vien a trovar,
E l'acqua nel fondo scominzia a cantar.
La canta, la ronfa, la subia,⁷ la fuma,
De qua la se sgionfa,⁸ de là la se ingruma,⁹
El fogo consuma col vivo calor
Le brombole in sciuma, la sciuma in vapor.
La bogie de boto,¹⁰ atenti! ghe semo¹¹

Più fiama de soto ― supiemo,¹² supiemo,
Che gusti, che zogie,¹³ la bogie, la bogie,¹⁴
La va, la galopa, la zira, la sciopa¹⁵
La fa la monfrina,¹⁶ farina farina,
La salta per soto, la sbrodola fora
Portème in cusina,¹⁷ farina farina.

          Ocio, ocio,¹⁸ oè Batocio!
          Ciappa in man tecia e caena¹⁹
          Miscia, volta, zira, mena,
          Dème²⁰ el tocio ― ocio ocio,
          Mola, tira, tira, mola
          E destira e stinca e fola,²¹
          La xe frola ― dài de qua
          Dài, dài, dài, la broa,²² la scota,
          La xe cota, la xe cota,
          Sior Florindo, la se senta²³
          Che xe fata la polenta.

     Dunque, magnèmola. ― Ghe manca el sal!...
Sal de la favola ― Xe la moral.
Eco la spatola ― La xe el mi' estro,
La xe el mi' genio ― Pronto e maestro:
E quel finissimo ― Fior de farina
Vol dir Rosaura ― E Colombina.
L'acqua broenta²⁴ ― Xe el nostro cuor,
E la polenta ― La xe l'amor.

---

Note

1. Spatola è il mestolo che Arlecchino porta al fianco e che, all'occorrenza, gli serve a menare nel paiuolo la polenta.
2. Sugo grasso.
3. È noto che Arlecchino è di Bergamo, città che fu già della Repubblica di Venezia.
4. Paiuolo.
5. Attaccata.
6. Bolla.
7. Zufola.
8. Gonfia.
9. Agglomera.
10. Tra poco.
11. Ci siamo.
12. Soffiamo.
13. Gioie.
14. Bolle.
15. Gira, scoppietta.
16. Balla la monferrina.
17. Portatemi in cucina.
18. Attento, attento.
19. Prendi in mano il paiuolo (tecia propriamente tegame) e la catena del focolare.
20. Datemi.
21. Distendi, e premi la polenta colla spatola, e pigia.
22. È bollente.
23. Si sieda.
24. Bollente.