Luna de setembre
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Proprio un azzal xe el cielo,
Un spechio el mar tranquilo,
L'aria no move un filo,
4Xe moderà el calor.
La luna, come brasa
Nata dal mar là in fondo,
De secondo in secondo
8Scolora el so rossor.
Eco, color de l'oro
La par in sto mumento;
Eco, la par d'arzento,
12Ecola a dominar.
Scampa dal ciel confuse
Le più brilanti stele,
Che d'esser manco bele
16Le stenta a tolerar.
Del mar la se fa spechio,
La fissa el viso belo,
E 'l mar un altro cielo
20Se vede a comparir.
Ste rive, ste vignete,
E quanto se presenta,
Tute le se inarzenta,
24Le gode al so aparir.
La luse, che modesta
La manda su l'ogeto,
Fa che ne resti in peto
28Qualcossa da bramar.
Crearse in un tal stato
Pol l'anima sicura,
Più bela la natura
32La so creatura amar.
Radopia, o cara Eurila,
Sto portentoso incanto,
Toca quel'arpa, e al canto
36Unissila d'amor;
Cinzia te lo dimanda,
Che benchè casta anch'ela,
D'amor la fiama bela
40Un dì ga scaldà 'l cuor!
Varda! el so ragio adesso,
Xe proprio sul to peto;
Un amoroso afeto
44No te se svegia in sen?
De mi no parlo, o cara,
Che inutile xe ogn'arte,
Gnente no so ispirarte...
48E pur, mio caro ben,
Pur te amarò costante...
Ma qual incanto novo?
In mi più no me trovo...
52Ti è un paradiso, sì...
Co apassionae ste voci!
Da che armonia interote!
Dopo una de ste note
56Che se vergogni el dì.