Madonna e no so dirve tante zanze
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Per esser desnuao, e no son degno | Edission e fonte ▼ | Dura passion, che per amar supporto → |
Madonna e no so dirve tante zanze,
O vu volè, o no crederme certo,
Che son vario, da le mie buganze.
Infina mo, e no mo descoverto,
Che mi ve voio ben alla real,
Si ben da basso, e fosse un puoco averto.
Cara fia m'haveu per un coccal,
Che no sia hom'da farve una investura,
Da mascherarve el di de Carneval.
Son si da bon buelo creatura,
Che cho vu provarè la mia amistae,
Pore dir, ho trovao bona ventura.
Domandè pur à tutte le brigae
Del fatto mio, e de che condicion,
Pien de vertue, e pien de facultae.
Forsi vu me tegnì, per un murlon;
Mo feghe un sazo, de la mia persona,
E si vu saverè, chi che mi son.
No son miga un pandol, ni una pipona,
Mo antigo da caurle, e da grao,
Come per tutto Buran se rasona.
Donca ve vegna Madonna peccao,
Dolce fia mia, cara, e saorosa,
Ni no credè, che sia tanto crevao;
Che voio al tutto, che siè mia morosa.