Mai più no vogio femene (1817)

by Giovanni Battista Bada

3 Canzonetta Giovanni Battista Bada XIX Canzonete

Indice:Collezione delle migliori opere scritte in dialetto veneziano 12.djvu

Giovanni Battista Bada

Canzonetta

XIX secolo

Edission original:	Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 12.djvu

Edission e fonte ▼

V. CANZONETTA

Mai più no vogio femene
     Tratar in avegnir;
     Le ò conossue per pratica,
     E tropo delirante
     Ò avudo da sofrir
     Straniezze tante.
Vedo in ancuo benissimo
     Come in amor fortuna
     Ghe vol, più assae che meriti;
     E i poveri Poeti
     Mai no ghe n'à nissuna,
     I xe negleti.
Ò fato ogni ppssibile
     Per cativarme el cuor
     De qualche dona amabile,
     Ma sempre fiasco ò fato.
     Ergo per far l'amor
     Mi no son nato.
Per quanto che m'esamina
     No so d'aver pecai.
     Sempre costante e ingenuo
     Ò conservà el mio afeto,

     Nè in gnente a mancà mai
     El mio rispeto.
Aver de l'antipatico
     No credo certamente:
     No son un omo vechio,
     E in qualche congiuntura
     Posso discretamente
     Far figura.
No son tanto melifluo,
     Lo acordo, nel parlar,
     Ma se me vede l'anima,
     Ma se me leze in cuor,
     Che so anca mi gustar
     Un vero amor.
No son el sior Cristofolo,
     Che manierete afeta,
     Ma so anca mi benissimo,
     E senza esser secante,
     Dir qualche paroleta
     Insinuante.
No go certa politica
     Per insensar, è ver;
     Ma questo no è demerito,
     Che xe anzi da stimar
     Quel omo che sincer
     No sa adular.
No son de viso palido,
     Come vorìa Marieta,

     Ma gnanca esser un etico
     No bramerìa per questo.
     Ò sanità perfeta,
     E vaga el resto.
Teresa mo me tacia
     Che peco in gelosia,
     Ma come xe possibile
     Che un omo vogia ben,
     E indiferente sia
     A quel che vien?
El far da secondario,
     El far da stropabuso,
     Mai no m'à piasso, a dirvela;
     Son facile e indulgente,
     Ma questo lo ricuso;
     O solo, o gnente.
Dise la siora Malgara:
     No se comanda al cuor,
     Ma xe le sole bestie
     Che senza riflession
     Segonda, più che amor,
     La so' passion.
La Nina xe insensibile
     Al mio sincero afeto.
     A letere da scatola,
     Perchè no resta iluso,
     La me l'à dito schieto
     In sul mio muso.

Dirò: che no me merita
     Chi donca no me vol,
     E cercherò passarmela
     Con qualche bon amigo,
     Ma un pochetin me dol,
     Sincero el digo.