Meditazione
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Cogitazioni | Edission e fonte ▼ | Consulto → |
.jpg)
- Laboravi in gemitu meo.
- Psal. V, 7.
- Laboravi in gemitu meo.
Solo! No ghè più gnanca don Bressan
E sento i boti dell'Avemaria
Che i se lamenta come fa un cristian.
Solo e qua sequestrà come una spia,
Serà come un sassin tra quatro mura
A consumarme de malinconia!
Varè che nebia in ciel, che sera scura!
Anime sante, che squalor de morte,
Che silenzio de tomba e de paura!
Le sentinele ga serà le porte
E sto scuro e ste ombre de preson
Ghè de le macie che i la ciama Corte!
Che toco d'ironia! Varè el paron
De l'anime dei regni e de le Chiese
Che medita, che pianze in zenocion.
E che sogna e che pensa al so paese,
A San Marco che xe tuto indorà
E a le casete bianche de Riese.
Come voria saver quelo ch'el fa
Quel povero inocente contadin
Che prima de partir gò confesà!
Forse contento de quel po' de vin
Che gà lassà la misera racolta,
Co la famegia el sta soto al camin.
E la bona mugèr, che la se volta
Soridendo ai putei, conta una fola
Che recordo anca mi.... Gera una volta...
O mare mia, la xe la to parola,
La to parola santa, el to soriso...
Ah, de mare qua zò ghe nè una sola!
Me sento ancora la to man sul viso,
Sento ancora i to basi, anima pura,
Che ti preghi per Bepi in Paradiso!
Ah, me recordo! Int'una note scura,
Te me andavi cunando e te disevi:
Bepi, xe el vento! No gavèr paura,
Dormi còcolo mio. Doman te devi
Alzarte a l'alba e andar lontan a piè
E caminar col vento e su le nevi.
Dormi, còcolo mio, dormi, perchè
Vol el Signor che quel bocon de pan
Sia guadagnà... Gera una volta un Re;
Sto Re el gaveva tropi cortesan
Che i se butava zoso a gatolon
Quando i gavèva da basar la man,
Ma el so palazo giera un gran torion
Pien de tanti soldai da far stupir
E sto póvaro Re giera in preson.
E quel Re quando el xe vegnuo a morir,
La Corte i e so vasali el gà ciamà,
E el ga dito cusì: - « Steme a sentir:
Ai omini tolèghe el pan, la cà,
La vita, la mugèr, quel che ve par,
Ma no tòleghe mai la libertà!
La libertà nesun l'ha da tocar
Perchè l'è don de Dio. Xe la natura
Che ai osèi ghe fa l'ale per svolar
E chi la tol agli altri, se procura
Le più tremende pene de l'inferno...»
Bepi, xe el vento! No gavèr paura —
O mare santa mia, sempre in eterno
Ricordarò i to basi e le parole
Ch'el to cor me diseva in quel inverno!
Varda! Mi son quel Re de le to fole,
Solo, in preson, che pianzo derelito;
No vedarò mai più libero el sole!
Basta, quel che fa Dio, lo fa pulito,
Ma intanto incaenà, povero Bepi,
Gnanca te pol magnar con apetito...
Voria vederghe el Cardinal Tripepi!