Mesi vechi/April
|
Edission original: |
Vittorio Gottardi, Mesi vechi, Treviso, Antonio Longo, 1883 |
|
Fonte: |
| ← Marzo | Edission e fonte ▼ | Magio → |
APRIL
El sol spande d’intorno l’alegria
E nel mondo se inalza, da ogni sito,
Una fresca canzon, ’ na poesia
Che se rampega su, ne l’infinito.
Torna i vecieti ancora su la via:
Ne l'aria i gà sentido un novo invito,
I trova che la forza no è finia,
E i vede tutto zovene e pulito.
Alzè i oci ai balconi. Tra dei fiori,
Sbociadi al primo sol de sta matina,
Fa baossete una testa de putela:
Una testa che fila i primi amori,
Che aspeta incocalida una divina
Zogia de basi su la boca bela! -