Mesi vechi/Lugio
|
Edission original: |
Vittorio Gottardi, Mesi vechi, Treviso, Antonio Longo, 1883 |
|
Fonte: |
| ← Zugno | Edission e fonte ▼ | Agosto → |
LUGIO
(Ricordi militari)
Se brusa. No ghe xe bava de vento,
L’aria infogada, bassa scelerata,
Pesa su la campagna... E un regimento
Fa soto sto fogòr la passegiata! -
Le file va in disordine e un lamento
Un desiderio d’acqua e de fermata
Va timido a le boche e un sfinimento
Ciapa i ochi e le gambe... «O che no i bata
Che no i bata el segnal de zaino a tera?»
― Fuori il passo, fiacconi! Dritti, fieri! -
E la trupa va avanti, sporca, nera
De sudor e de fango. Avanti, avanti!...
Casca un soldà. El fa apposta?.. Presto i feri!
Nol se move?.. L’è morto?.. Eh! ghe n'è tanti!