Metempsicosi

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Riccardo Selvatico

Metempsicosi

XIX secolo

Edission original:	Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910
Fonte:	Indice:Selvatico - Commedie e Poesie Veneziane, Milano, Treves, 1910.pdf

Edission e fonte ▼

[p. 256 modifica]

METEMPSICOSI.

Se xe vero che un dì resussitar
     Dovemo in qualche bestia, mi voria
     Poder morir doman, belezza mia,
     E un colombo de piazza deventar.

Voria anca mi, vedendote passar,
     Svolarte come lori intorno via;
     Come lori anca mi me piasaria
     Vegnirme s’una spala a cufolar.

Voria anca mi i granei de formenton
     Vegnirme a tor, belezza, in boca a ti,
     Po’ subito tornar sul cornison

E contento restarghe tuto el dì;
     Vardar la zente e in quela prucission
     Schitarghe sul capelo a chi vôi mi!