Nina, intendessimo (1817)

by Giovanni Battista Bada

3 Canzonetta Giovanni Battista Bada XIX Canzonete

Indice:Collezione delle migliori opere scritte in dialetto veneziano 12.djvu

Giovanni Battista Bada

Canzonetta

XIX secolo

Edission original:	Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 12.djvu

Edission e fonte ▼

IV. CANZONETTA

Nina, intendessimo
     Senza far scene.
     Per tì più viver
     4No vogio in pene.
Zozo dei bazari
     Me va l'amor;
     Me costa el perderte,
     8Ma ghe vol cuor.
Quel sempre in colera,
     Sempre in barufa
     Vol chiaro esprimer:
     12De tì son stufa.
Vedo benissimo
     Che un altro ogeto
     T'ocupa l'anema,
     16Lo vedo schieto.
Mi no go meriti
     Per impegnarte,
     No son melifluo
     20Per cocolarte;
Son omo ingenuo
     Nel mio tratar,

     No go politica
     24Per adular.
Ti pol, volendolo,
     Conoscer ben
     Se un cuor sensibile
     28Mi gabia in sen,
Ma a certe smorfie
     D'adulazion,
     Per mia disgrazia,
     32Nò, no son bon.
Fazzo el passibile
     Per darte prove
     D'amor, ma è inutile,
     36Gnente te move.
Donca lassessimo
     Senza sussuri,
     Senza altre colere,
     40Nè musi duri.
Questo sia l'ultimo
     Dei mii lamenti,
     Sia questo 'l termine
     44Dei mii tormenti.
A quelo atachite
     Che più te piase,
     E Tita lassilo
     48Almanco in pase.
Ma senti, barbara,
     Vegnirà un dì

     Che ti à da pianzer
     52Fursi per mi;
Ti à da conosser,
     Crudel! e presto
     Cossa sia perder
     56Un omo onesto.