Nineta, el cuor me bagola
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Nineta, el cuor me bagola
Da l'alegrezza estrema,
E tanto son estatico,
4Che d'insoniarme ò tema,
Me par squasi impassibile
D'esserte al fianco ancora,
Dopo d'averte, incauto,
8Lassà per mia malora.
No gera mai credibile
Che dopo un abandon
De tanto tempo, a dirtela,
12Trovasse compassion;
Epur, Nineta amabile,
Scordando el mio traviar,
Ti ga pietà d'un misero,
16E ti lo torni a amar.
Pazienza, se contrario
Me gera prima Amor,
Se tanto ancuo propizio
20Lo trovo a mio favor.
Za no podeva vederme
Al fianco de nissuna,
El che xe sta preludio
24De tanta mia fortuna.
Ma xe fortuna instabile,
Nè dura sempre el ben,
E no voria che 'l netare
28Cambiasse po in velen.
Temo che ancora l'anima,
Cara Nineta mia,
Come ti vanti, libera
32Del tuto, oimè! no sia;
Temo un amor residuo
De quel che ancuo ti abori,
Perchè a parlar ti esageri
36Co d'elo ti discori.
Nineta, no te ofender
De sto mio gran sospeto,
Perchè el timor de perderte
40Xe prova del mio afeto;
E quel amor conservime
Che ti me mostri adesso,
Che mi, cara mia cocola,
44Co ti farò l'istesso.