Note d'Agosto
|
Edission original: |
Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910 |
|
Fonte: |
Indice:Selvatico - Commedie e Poesie Veneziane, Milano, Treves, 1910.pdf |
| Edission e fonte ▼ |
Do baloni de carta in t'un batelo,
La vose de un’armonica lontana,
Dal Lido quieto quieto un venteselo,
San Zorzi in fassa e in fianco la Dogana,
La luna in alto, che da mezo el cielo
Se specia in aqua come ’na sultana,
La gondola che passa e che bel belo
In fregole la manda e se alontana:
E mi sul Molo pensieroso intanto
Che vado tormentandome a dar viva
Tuta la poesia de quel’incanto,
El fis-cio sento de un vapor che ariva
E sento l’onda che de tanto in tanto
Vien per burlarme a s-ciafizar la riva.