XI.
Imaginarse mì... mì, che fumava
Un paco cussì grando al dì de fogia,
Che tiramento oribile, che vogia
De pipar, note e dì, me tormentava!
Imaginève, pò, se ghe tirava
El naso a mìa madona, a quela zogia
Che gera stada sempre la mìa dogia!...
Epur, la ga volesto far la brava.
Quando che 'l naso ghe tirava massa,
La tabacava pevare o canela
O làvreno brusà... ma salda, cassa!
L'azion più bona che l'à savuo far...
Fogo ai sigari nàin, porca mastela!...
A l'Austria fogo ghe volemo dar!
