XXXII.
Sora la tore de Samarco, al vento,
Scadala come 'l sangue, una bandiera
Subito à sventola... che ardor de drento
Co l'èmo vista sbampolar liziera!
E la ga vista in ogni bastimento
I Croati dal mar; là, da Malghèra
E da Mestre, i i'à vista... in quel momento
L'à vista sventolar tuta la tera.
La ghe diseva a tuti: — In fin che in alto
A torme via de qua no vignarè,
Venezia batarà salda a ogni assalto.
La ghe diseva a çerti: — Soli semo,
Ma infin l'ultimo fià, l'ultimo schè,
Per insegnarlo a vù, resistaremo!
