Pagina:Assedio de Venezia.djvu/43

Sta pagina la xe stà trascrita, ma la gà ancora da vegner rileta.
XXXV.


Ah, vissare, che giubilo e che vista
Che mì godesto no go mai l'ugual,
Quando Manin, seguìo dal genaral
Pepe, co' in viso un'aria nè ben trista

Nè ben alegra, el ga passà in rivista
I soldai de la Guardia Nazional,
Peti de bronzo, gareti de azzal
Che andai sarìa del mondo a la conquista!

Sventola le bandiere sui penoni
E se sente 'rivar, de trato in trato,
Da lontan, el rebombo dei canoni.

― Viva San Marco! ― el ziga ― Iddio lo vuole! ―
E un colpo de canon, ma tanto fato,
Ga messo el punto fermo a ste parole.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Assedio_de_Venezia.djvu/43&oldid=61816"