LVI.
Sì, me xe morte, alora, quele sante
De mìa muger e de mìe fìe... 'na fiola
Me xe restada... E note e dì l'ò piante
E 'l pianto ancora el me s'ingropa in gola.
E le me xe mancae tute, distante
Una da l'altra... el còlara!... Una sola
Morir no ghe n'ò visto... una, de tante,
No l'à podesto dirme una parola!
Mi, se fusse stà Dio, tuti i tormenti,
Che cò st'altre miserie el n'à mandà
E che muger e fioi vìa n'à portà,
Mandai ghe l'avarave a colù là
Che stava a Viena e a tuti i so parenti
Più prossimi, presenti e dissendenti!
