LVII.
Le naranze da Viena, eco, le bale
— Tacando fogo — sìa de zorno o note:
Ma co lore a le bocie i zioga a frote
I putei per i campi e per le cale.
Zi! Zi! le fa passando e ― s'ciac! ― ste bòte
Sora le case; ma da drìo le spale
Butemo, senza dir: — Dove mai vale,
'Desso, a cascar?...—, quele... patate cote.
Ma un dì 'na bomba, in t'un de quei viagi
Da l'una a l'altra riva, zò se cala
E, vissin al tragheto o in quei paragi,
Senza tocarme el peto nè la spala,
No me xela passada soto i scagi?...
Ridé vualtri... ma no l'è 'na bala!...
