LVIII.
Da Canaregio e Santa Luçia andai
A la Zueca i xe fra mile stenti:
A Castelo i se xe ricovarai
In te le ciese e fin nei bastimenti.
Drento i Giardini, esposti a l'aqua e ai venti,
Per strada o in barca a çento i l'à portai
Vecie e vecieti povari, cadenti
Bambini apena nati e malatai.
In palazzo ducal ga dormìo tanti
De quei, che, drento i povari tuguri,
Viveva in mezo al pocio e in mezo ai pianti.
E quei guerieri li vardava e i santi
Depenti su le tele in tuti i muri,
Disendo: — Abiè pazienza... avanti! avanti!
