LXII.
La prima bala?... L'à ciapà 'na strada
De quele veramente originai.
Sta curiosona ai pì no l'è cascada
Del leto de do sposi indormenzai?...
Lori i salta in senton sù, spaventai;
E la sposina, a so mario tacada,
La pianze e ziga: — Coss'è nato mai?...
Gastu anca tì sentìo sta sfracassada?... ―
E tanto ela quanto so marìo
Vien zoso e i varda... fumo e un buso!.. E ormai,
Capida la razon de quel fifìo,
Ve so dir mi che in leto i xe tornai
E fin squasi matina i à benedìo
Quel gran fracasso che li ga svegiai!
