Pagina:Attilio Turco - Sonetti Veronesi.djvu/10

Sta pagina la xe stà trascrita, ma la gà ancora da vegner rileta.
SENTO FRANCHI


Me par d’essar paron de meso mondo,
     Quando che gò in scarsela sento franchi;
     Tuti i pensieri tristi i me va in fondo,
     E anca i più neri... i me deventa bianchi!

Se cato quei che vansa, no me scondo,
     Ma serco de cassarmeghe 'n te i fianchi,
     Par darghe da conossar ciaro e tondo
     Che sempre, o Dio dell’Or, no te me manchi!

E in poco tempo: paga, paga e paga,
     I sento franchi i se reduse a diese,
     A sette, a sinque, a quattro e che la vaga!

Torno in boleta1 e seguito a far spese;
     E, se no ghè nessun che me ne daga,
     Speto a pagar ai trentadu.... del mese.

  1. in boleta - al verde.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Attilio_Turco_-_Sonetti_Veronesi.djvu/10&oldid=71327"