EL SOPRIMENTO!...
— «El soprimento!...»1 in volta par le strade
Sento striloni, a ci più pòl, i siga;
E i core che i par anime danade
— «El soprimento!... che no’ sbalia miga!
I nostri con tre, quatro s-ciopetade,
J-à za passà ’l confin, sensa fadiga;
De Checo Bepo in pressia jè scapade
Le sentinele, prima che i le liga! — »
El popolo, a sentir ste bone nove,
Pien d’entusiasmo el passa la parola:
El se scalda, el se esalta, el se comove!
— I nostri i vense! — Tuti se consola.
— «El soprimento!» — e i serca, ci lo lese
Se gh’è su qualchedun del so paese!
- ↑ Soprimento - supplemento.
