Pagina:Attilio Turco - Sonetti Veronesi.djvu/124

LA RETIRADA

’Na sera, sul canton de ’n vicoleto,
     Ho visto ’na putela co ’n alpin;
     Ghe son passàdo a rente¹ e, un discorseto
     I se fasea tra lori, a pian-pianin:

Elo ’l disea: — l’è un’ora che te ’speto,
     Par poder ’starte insieme un pochetin —
     Ela: te’l sè, che gò me mama in leto
     E pena adesso² ò indormensà ’l putin —

— Presto i me sonarà la retirada,
     Se ciapo diese iorni de rigor...
     La fassenda l’è bela e terminada,

Parchè i me manda al fronte, a far l’amor...
     Ciao, dame un baso... — Ciapa³ e scapa via,
     Più tardi... se faremo compagnia! —

1. darente ― vicino;
2. pena adesso ― tanto e quanto;
3. ciapa — prendi.