Pagina:Attilio Turco - Sonetti Veronesi.djvu/134

I TEDESCHI E LA PACE

Volìo la pace? Ah, si, bela fadiga!
     Ve n’acorsìo¹ che ’l vostro Guglielmon
     El sercava de trarve al rebalton?...
     Ocor che qualche-duno ve lo diga?...

Anca l’Austria, la vostra bona amiga,
     L’è drio che la se brusca² ’na lession...
     La ghe le dà l’Italia, col canon
     E con Cadorna, che no ’l schersa miga!

Volìo la pace?... Mi ve la faria;
     Tuto a 'sto mondo deve averghe fine...
     O tedeschi dal ciodo, ma voria,

Che prima ghe tornasse le manine,
     Che voialtri g’avì tajado via,
     Ai fioi del Belgio... pore creaturine!...

1. ve n’acorsio ― ve ne accorgete;
2. brusca ― prende.