Pagina:Attilio Turco - Sonetti Veronesi.djvu/16

II.

Quando fasea amor co ’na putela,
     Parlemo almanco de trent'ani fa,
     Ghe disea: te si bona! te si bela!
     — Te si brava!... te si... ’na rarità! —

Ghe refilava¹ qualche caramela,
     De quele co la menta o col mistrà;
     Alora ghe n’avea sempre in scarsela,
     Parchè se le comprava a bon marcà...

E me recordo, tute ste putele,
     (Ghe n’ò squassado² tante che no so)
     Le se godea ciuciar³ le caramele,

Ma par i basi le disea de no...
     Quela che m’à basà, me l'ò sposada...
     Oh Dio! quel baso, fioi, che busarada!⁴

1. refilava - porgeva, regalava;
2. squassado - innamorate;
3. ciuciar - assaporare;
4. busarada - buggerata.